Aqtóbede 1 shildede týǵan ár balaǵa dombyra syıǵa beriledi
Astana qalasynyń 20 jyldyǵyna arnalǵan mádenı-buqaralyq shara jyl boıy ótkizililýde. Máselen, shyǵarmashylyq ujymdar Reseıdegi, Túrkııadaǵy, Italııadaǵy, Indııadaǵy festıval-konkýrstarǵa qatysyp, Orynbor oblysymen shekaralas bes aýdanda «Astana - arman qala» atty mádenı is-sharalar ótkizdi. Al Ózbekstannyń Nókis qalasynda «Aqtóbe-Nókis: áriptestik pen ózara yntymaqtastyq» atty kontsert uıymdastyryldy.
«25 maýsymda mádenıet jáne óner qaıratkerleri, belsendi jastar qatysqan, Qyzylorda, Ońtústik Qazaqstan, Jambyl, Almaty, Qaraǵandy oblystarynda jáne taǵy da 11 eldimekende bolatyn «Qutty meken Aqtóbeden araıly Astanaǵa» avtokerýeni jolǵa shyqty. 1-shildede avtokerýen 5170 shaqyrym jol júrip, Astanaǵa jetedi. Sonymen qatar, «Týǵan jerim-nurly elim» Aqtóbe oblysy aýdandarynyń kúni bastalady. 30 maýsym - 6 shilde aralyǵynda Aqtóbe oblysynda «Plain Air» kórkemóner sımpozıýmy, shildede -«Án-ǵumyr» respýblıkalyq retro festıvali, «Dala akkordy - Stepnoı akkord» bard ánderin oryndaýshylardyń halyqaralyq festıvali, al tamyzda «Jibek joly» respýblıkalyq konkýrsy bolady»,- dedi oblystyq mádenıet basqarmasynyń basshysy Marjan Qorǵanbaeva.
Ulttyq dombyra kúni Aqtóbedegi «Qazaq eli» stellasynyń janynda qazaqtyń ulttyq aspaptarynyń murajaıy ashylady. Sonymen qatar, 500 aqtóbeliktiń, Ǵ.Jubanova atyndaǵy oblystyq fılarmonııanyń ult aspaptar orkestriniń qatysýymen fleshmob ótkiziledi.
«Aqtóbe oblysynda 1 shildede týǵan árbir otbasydaǵy alǵashqy balaǵa dombyra syıǵa tartylady. Tutastaı alǵanda, Ulttyq dombyra kúnine oblys boıynsha 300-ge jýyq is-sharany ótkizý josparlanyp otyr. Baıǵanın, Alǵa, Temir, Qobda, Muǵaljar, Oıyl aýdandarynda dombyra patı ótedi. Alǵa aýdanynyń turǵyndary bir ýaqytta jappaı kúı oryndap, Temir aýdanynda «Altyn dombyra» jas kúıshiler baıqaýy, Mártókte jastardyń qatysýymen fleshmob, dombyrashylar baıqaýy uıymdastyrylady»,- dedi Marjan Qorǵanbaeva.
