Aqtóbede 1 myńnan astam jigit Otan aldyndaǵy boryshyn óteýge asyǵar emes

AQTÓBE. KAZINFORM — Bıyl kóktemde — 1100, kúzde — 1100 aqtóbelik ásker qataryna alynady. Óńirde myńnan astam jigit áskerı boryshyn óteýge asyǵar emes.

Aqtóbe oblysy boıynsha byltyr 1992 er adamdy áskerge qabyldaý tapsyrmasy qoıyldy. 

Oblystyq qorǵanys isteri basqarmasy 2024 jigitti túrli áskerı bólimge jiberip, jospardy túgel oryndady. 

— Bıyl kóktemde 1100, kúzde 1100 aqtóbelik áskerge shaqyrylady. Aldymen Ulttyq qaýipsizdik komıtetiniń shekara qyzmetine jiberiledi. Sonymen birge QR Qarýshy kúshteri, Ulttyq ulan, Memlekettik kúzet qyzmeti men Tótenshe jaǵdaılar mınıstrligi qyzmetine bólinedi. Buryn áskerge shaqyrý naýqany bastalǵanda úıine habarlama jiberetin edik. Qazir bári tsıfrlandyrylǵan. Qazir 1414 qyzmeti arqyly uıaly telefon nómirlerine habarlama jiberiledi, — dedi Aqtóbe oblystyq Qorǵanys isteri departamentiniń bastyǵy Ádilet Otarbaev. 

Aıta keteıik, qorǵanys isteri departamentiniń habarlamasy negizinde bólimge barmaǵan jigitterdiń aty-jóni polıtsııaǵa beriledi.

Keıde polıtsııa qyzmetkerleri mekenjaıyn tekserip, olardy áskerı bólimge jetkizedi. 

Byltyr shaqyrtýdy elemegen myńnan astam aqtóbelik izdeýde júr.

Sonymen birge Ákimshilik quqyqbuzýshylyq kodekstiń «Azamattardyń áskerı esepke alý jónindegi mindetterdi oryndamaýy», «Medıtsınalyq tekserilýden nemese jıyndardan jaltarý», «Áskerı esepke alý qujattaryn qasaqana búldirý nemese joǵaltý» jáne «Turǵynjaı menshik ıesiniń nemese qaramaǵynda turǵynjaılar, ǵımarattar jáne (nemese) úı-jaılar bar basqa da tulǵalardyń olarda naqty turmaıtyn jeke tulǵalardy tirkeýge jol berýi ne menshik ıesine tıesili nemese basqa da tulǵalardyń qaramaǵyndaǵy turǵynjaılarda, ǵımarattarda jáne (nemese) úı-jaılarda tirkelgen jáne turmaıtyn jeke tulǵalardy tirkeýden shyǵarý jóninde sharalar qoldanbaýy ne jeke tulǵalardyń tirkeýsiz turýyna jol berýi» baptary boıynsha 100-den astam áskerge shaqyrylýshy jaýapqa tartyldy.