Aqtóbede 1 kýrs stýdentteri oblys ákimdigi janynda jappaı tóbelesti
AQTÓBE. QazAqparat - Aqtóbe oblysy ákimdiginiń janynda 3 kolledjdiń oqýshylary jappaı tóbelesti. Olardan pyshaq pen qoldan jasalǵan ótkir zattar tabyldy.
Bul týraly oblystyq jergilikti polıtsııa bastyǵy Qanybek Jaqsyǵalıev aıtty, dep habarlaıdy QazAqparat tilshisi.
Jańa oqý jylynda kolledj oqýshylary jappaı tóbelesti. Aýdandyq bilim bóliminiń basshylarymen, mektep, kolledj dırektorlarymen kezdesý ótkizgen Aqtóbe oblystyq jergilikti polıtsııa qyzmetiniń bastyǵy Qanybek Jaqsyǵalıevtiń aıtýynsha, oblys ákimdigi ǵımaratynyń janyna Zań kolledji, Qazaq-orys halyqaralyq ýnıversıteti janyndaǵy kolledji, Kólik, kommýnıkatsııa jáne jańa tehnologııalar kolledjiniń stýdentteri tóbelesken. Olardan pyshaq jáne qoldan jasalǵan úshkir, ótkir zattar tabyldy.
«Qyrkúıekte Aqtóbe qalasyndaǵy baılanys kolledjinde eki stýdent tóbelesip qaldy. Bul ǵımarat ishinde bolǵan tóbeles. Sondyqtan bul baǵyttaǵy jumysty jandandyryp, ata-analardyń qatysýymen jınalys ótkizý qajet. Eger bala baqylaýsyz qalsa qylmys kóbeıedi»,- dedi Qanybek Jaqsyǵalıev.
