Aqtóbede 1,7 mıllıon teńge para alǵan bólim basshysy tergeý aıaqtalǵansha qamaýda bolady

AQTÓBE. QazAqparat - Aqtóbede zańsyz kásipkerlik týraly qylmystyq isti sotqa deıin toqtatý úshin 1,7 mıllıon teńge para aldy dep kúdikke ilikken B. Mereı eki aı qamaýǵa alyndy, dep habarlaıdy QazAqparat tilshisi. 

Aqtóbede Memlekettik kirister departamentiniń ekonomıkalyq tergeý qyzmeti basshysynyń mindetin atqarýshy B.Mereıdiń ustalǵany týraly aqparat keshe tarady.

Al búgin №2 Aqtóbe qalalyq sotynda 2 aı qamaýǵa alý týraly bultartpaý sharasy sanktsııalandy.

«2016-2018 jyldar aralyǵynda oblystyq memlekettik kirister departamentiniń qyzmetkeri birneshe ret «MaksGazKompanı» JShS-niń basshylyǵynan suıytylǵan gazdy zańsyz tasymaldaý deregi boıynsha jaýap aldy. 2018 jyldyń maýsym aıynda Memlekettik kirister departamentiniń ekonomıkalyq tergeý qyzmeti basshysynyń mindetin atqarýshy B.Mereı istiń ýaqyty ótýine baılanys jabýǵa bolatynyn, ol úshin arnaıy syıaqy qajet ekenin aıtady.

Kompanııa basshysy Esenov qylmystyq iske arlaspaý úshin QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń oblystyq departament qyzmetine habarlasady. 2018 jyldyń 11 shildesi kúni saǵat 17:00-de B.Mereı gaz kompanııasynyń ókiline telefon shalady. 17:30-da Esenov qaladaǵy balalar aýrýhanasynyń avtoturaǵyna aqshany aparady. B.Mereı 1,7 mıllıon teńge para alý ústinde ustaldy»,- dedi memlekettik aıyptaýshy Jánibek Tórebekov.

Qylmystyq kodekstiń «Para alý» baby boıynsha is qozǵaldy.

Tergeý jumystary aıaqtalǵansha kúdikti ızolıatorda otyrady.