Aqtóbe jylyjaıynda óndirilgen qyzanaq Reseıge eksporttalyp jatyr
AQTÓBE. QazAqparat - Aqtóbede «Greenhouse Kazakhstan» jylyjaı kesheniniń aýmaǵy keńeıtilip jatyr. Bul óńir suranysyn tolyq qamtamasyz etetin joba. Qazirgi kezde Aqtóbe jylyjaıynda óndirilgen qyzanaq Reseıge eksporttalyp jatyr, dep habarlaıdy QazAqparat tilshisi.
Aqtóbe qalasyndaǵy «Greenhouse Kazakhstan» jylyjaı kesheni sáýir aıynda iske qosylyp, 2,5 myń tonna qyzanaq satýǵa shyǵaryldy. Kúnine 20 tonna qyzanaq jınalatyn keshen óz-ózin jylýmen, elektr qýatymen qamtamasyz etip otyrǵan birinshi joba. Joǵary tehnologııaly keshenge arnaıy press-týr ótkizildi. 
«Qazaqstanda birinshi ret jylyjaı kesheninde gaz paıdalanylyp, elektr qýaty óndirilip jatyr. Qýattylyǵy - 6 mVt. Bul - shaǵyn qalany jaryqpen qamtamasyz etetin elektr qýaty. Elektr toǵymen jylyjaı ishin jaryqtandyryp otyrmyz. Avstrııa tehnologııasy boıynsha iske asyrylǵan joba 5-6 jylda óz-ózin aqtaıdy»,- dedi jylyjaı kesheniniń atqarýshy dırektory Maqsat Bektaev.
Aqtóbe oblysynyń ákimdigi, «QazAgro» AQ, «QazAgroQarjy» AQ, Aýyl sharýashylyǵy mınıstrligimen aradaǵy memorandým aıasynda «Greenhouse Kazakhstan» JShS aýmaǵy 100 gektar bolatyn jylyjaı salýy tıis. Qazirgi ýaqytta jylyjaı aýmaǵy - 9,5 gektar. Aldaǵy ýaqytta 20 gektarǵa jetkiziledi.
«Ýltraklımat tehnologııasy boıynsha jabdyqtalǵan jylyjaı elimiz boıynsha jalǵyz. Dúnıejúzinde mundaı jylyjaıdyń aýmaǵy 200 ga bolsa, onyń 2,5 gektary Aqtóbede ornalasqan. Bul tehnologııa kókónistiń jaqsy ósýine septigin tıgizedi. Burynǵy jylyjaılar jazda qatty ystyq bolatyn, al jańa tehnologııamen salynǵan keshende jyl boıy 24 gradýs jylylyq saqtalady»,- dedi Maqsat Bektaev.
Ónimniń teń jartysy Reseıge eksporttalyp jatyr. Jobanyń quny - 5,2 mıllıard teńge. 
«Sáýir aýynda iske qosylyp, tórt aıda 2,5 myń tonna ónim óndirildi. Jylyna 6,5 myń tonna qyzanaq pen qııar alamyz. Gollandııalyq tehnologııa boıynsha salynǵan jylyjaıdyń qurylysyna qajetti qarjynyń 30 paıyzy kásipkerdiń, ózge «QazAgroQarjy» AQ-na tıesili. Aldaǵy ýaqytta mundaı jobalardyń barlyǵyn «Agrarlyq nesıe korporatsııasy» AQ qarjylandyratyn bolady»,- dedi «QazAgroQarjy» AQ-nyń Aqtóbe oblystyq fılıal dırektory Aıdar Brashev.
Jylyjaıdyń gollandııalyq tehnologııasy «QazAgroQarjy» AQ arqyly lızıngke alyndy. «Bıznestiń jol kartasy - 2020» memlekettik baǵdarlamasy aıasynda gaz, elektr toǵy men sý jetkizildi. 120-dan astam jumys orny ashyldy.
«Aqtóbe oblysy boıynsha barlyǵy 26,5 gektar jylyjaı bar. Qazirgi kúni oblys halqy 85 paıyzǵa úzilissiz qyzanaqpen qamtamasyz etilip otyr. Birer jylda oblys suranysy tolyq qamtamasyz etiledi. Óńirde tek qııar men qyzanaq egiledi. Jylyjaıda bir jyl qyzanaq ósirse, keler jyly qııar egedi. Aýyspaly egis paıdaly»,- dedi Aqtóbe oblystyq aýyl sharýashylyǵy basqarmasy basshysynyń orynbasary Asylhan Ábdıev.
