Aqtóbe jylytý maýsymyna daıyn ba
AQTÓBE. KAZINFORM — Aqtóbe qalasynyń jylý berý maýsymyna daıyndyǵy 75% jetti. Qyrkúıek aıynyń alǵashqy onkúndiginde tolyq aıaqtalyp, synaq júrgiziledi.
Aqtóbe qalasynda 2 100 kóp páterli turǵyn úı bar. Onyń ishinde 544-i jeke avtonomdy jylytý júıesimen jáne qazandyqpen qamtylǵan. Sonymen birge taǵy 28 qazandyq «Aqtobe Su-Energy Group» AQ teńgeriminde, al 103 qazandyq basqarýshy organdardyń menshiginde. Búgingi tańda 11 qazandyqqa kúrdeli jóndeý, 92 qazandyqqa aǵymdaǵy jóndeý jumystary júrgizilip jatyr.
Aqtóbe qalasy ákiminiń baspasóz qyzmetiniń habarlaýynsha, PIK, MIB tarapynan turǵyndar jınaǵan maqsatty jarnaǵa 18 úıde aǵymdaǵy, 12 úıde kúrdeli jóndeý júrgizilip jatyr. 2023-2029 jyldarǵa arnalǵan turǵyn úı-kommýnaldyq ınfraqurylymdy damytý tujyrymdamasy aıasynda da qarjy bólinip, 18 úıdiń jylytý júıesinde qubyrlar aýystyryldy.
— Qalada 46 páter ıeleri kooperatıvi, 43 tutyný kooperatıvi, 322 menshik ıeleriniń birlestigi jumys istep tur. Biz olardyń bárine «Aqtobe Su Energy Group» AQ mamandarymen birge baryp, aldaǵy jylytý maýsymyna daıyndaý týraly habarlama tarattyq. KSK tóraǵalarymen birge turǵyndarmen kezdesip, úıdiń jertólesindegi qubyrlardy jóndeý nemese aýystyrý úshin qarjy jınaý qajet ekenin túsindirip jatyrmyz, — dedi Aqtóbe turǵyn úı ınspektsııasy bóliminiń basshysy Aqnur Qazbaeva.
Al «Aqtobe Su-Energy Group» AQ-nyń bas dırektory Naǵymjan Aldııarovtyń aıtýynsha, qalada jylý, sýmen jabdyqtaý jáne káriz sýyn burý qubyrlaryn jańǵyrtýǵa 2,5 mlrd teńge jumsalady. Qazir qaıta jańǵyrtý jumystary 75% aıaqtaldy. Onyń ishinde 3,73 shaqyrymdyq jylýmen jabdyqtaý jelisin jańǵyrtýǵa 1 mlrd teńgeden astam qarjy jumsaldy. Sýmen jabdyqtaý júıesine 778 mln teńgeden astam qarjy qarastyryldy. Oǵan 7 shaqyrymnan astam jeli jańaryp jatyr. Al káriz júıesine 580 mln teńgege jýyq qarjy qarastyrylyp, jańǵyrtý 4,47 shaqyrymdy qamtydy.
— Jylý qubyrlaryn aýystyrý jumysy jalǵasyp jatyr. Aldaǵy on kúnde jumys aıaqtalyp, qyrkúıekte gıdravlıkalyq synaq bastalady, — dedi Naǵymjan Aldııarov.
Buǵan deıin habarlaǵanymyzdaı, Aqtóbede áli de pesh jaǵatyn jeti bilim berý nysany bar. Búginde mektep pen balabaqshaǵa qajetti otynnyń 90% jýyǵy tasymaldandy.
