Aqtóbe jedel damýshy aımaqtar qataryna umtylady
ASTANA. QazAqparat - Osy aptada Aqtóbe oblysynyń ákimi Berdibek Saparbaev BAQ ókilderimen kezdesý ótkizip, osy óńirde atqarylǵan ıgi ister men júrgizilip jatqan basqa da mańyzdy jumystar haqynda keń áńgime qozǵady.
Jıynǵa óńirdegi barlyq buqaralyq aqparat quraldarynyń basshylary, basylymdar redaktorlary men jýrnalıster, jergilikti elektrondyq aqparat kózderindegi blogerler qatysty.
Óńir basshysy óz sózinde Memleket basshysynyń osy oblystaǵy áleýmettik-ekonomıkalyq damýdy qamtamasyz etý boıynsha tapsyrmalarynyń oryndalýy jáne bıylǵy jyldyń birinshi jartyjyldyǵynyń qorytyndysy aýqymyn qamtydy. Atap aıtqanda, ótken 6 aı nátıjesinde oblys ekonomıkasynyń ósimi 4 paıyz shamasyn quraǵan eken. «Bul respýblıkamyzdaǵy jedel damýshy aımaqtar qataryna enýge múmkindik berdi», - dep atap kórsetti oblys ákimi.
Qıynshylyqtarǵa qaramastan, esepti kezeń aralyǵynda ónerkásip óniminiń kólemi 4,9 paıyzǵa ulǵaıǵan. Mundaı ósimge hrom rýdasyn, kontsentrattardy, rels ónimin jáne ferroqorytpalardy molaıtý esebinen qol jetkizilip otyr. Ákimniń aıtýynsha, barlyq negizgi áleýmettik-ekonomıkalyq kórsetkishter ótken jyldaǵydan joǵary jáne respýblıkalyq deńgeıdegimen salystyrǵanda tómen de emes eken.
Oblystaǵy ónerkásip kásiporyndary esepti kezeńde 700 mıllıard teńgeniń ónimin óndirgen. Óńdeý ónerkásibindegi ilgerileý deńgeıi 111,4% shamasyn qurap, atalǵan kórsetkish boıynsha oblys elimizdegi óńirler arasynda ekinshi oryndy ıelengen.
Negizgi kapıtalǵa quıatyn ınvestıtsııada da jetistikter bar. Naqty aıtatyn bolsaq, óńir ekonomıkasyna 160 mıllıard teńgeden astam qarjy tartyldy. Bul ótken jyldyń osy kezeńimen salystyrǵanda 32%-ǵa artyq. Jalpy quny 33 mıllıard teńge bolatyn 17 ınvestıtsııalyq jobany júzege asyrý aýmaǵynda aǵymdaǵy jyly 1700 jańa jumys orny ashylady. Óńirde jalpy alǵanda 8,2 myń jańa jumys orny qurylǵan, jyl sońyna deıin shamamen taǵy osynshama jumys ornyn ashý josparlanǵan.
Óńir úshin asa mańyzdy aýyl sharýashylyǵynyń jalpy ónimi 103,7%-ǵa ósken. «Kooperatsııa týraly» zań oıdaǵydaı júzege asyrylýda. Osy kezeńde barlyǵy 171 kooperatıv qurylǵan, osy jyldyń sońyna deıin taǵy da 26 ujym qurylady dep kútilýde.
Oblys úshin asa jaýapty sala - aýyl sharýashylyǵynda 50 mıllıard teńgeniń ónimi óndirilgen. Egis alqaptaryn 78 myń gektarǵa ulǵaıtý oń nátıjesin berip otyr. Dástúrli emes salalar boıynsha 88 joba qolǵa alynǵan, sýarmaly alqaptar 21 myń gektarǵa deıin ulǵaıǵan.
- Bul baǵyttaǵy jumystar óz jalǵasyn taba beretin bolady, osylaısha Memleket basshysy alǵa qoıǵan ósirilgen ónimdi óńdeý jumystaryna qatysty mindetti oryndaýdy qamtamasyz etemiz. Bul bizge birinshiden, qosymsha jumys oryndaryn ashýǵa múmkindik beredi, ekinshiden, et jáne sút kombınattarynyń jumysyn kóbeıtedi, - deıdi B. Saparbaev.
Qurylys salasynda jarty jyl qorytyndysy boıynsha 50 mıllıard teńge shamasyndaǵy qarjynyń qurylys jumystary atqarylǵan. Tek bıyldyń ózinde ǵana 242 myń sharshy metr turǵyn úı paıdalanýǵa berilgen, al jyl sońyna deıin kem degende 650 myń sharshy metr turǵyn úı salynbaq. Jeke turǵyn úı qurylysyn damytý aıasynda bıyl 15 myń jer telimin berý josparlanǵan.
Taǵy bir mańyzdy bir másele, Aqtóbe - Qazaqstandaǵy «Nurly jer» baǵdarlamasy aıasynda «taýnhaýs» tıpindegi úsh qabatty nesıelik jáne tez turǵyzylatyn jeke turǵyn úılerdiń qurylysyn júrgizip jatqan sanaýly qalalardyń biri. Birinshi kezeńde 2952 páterlik turǵyn úı salynbaqshy, sonyń ishinde 2017 jyldyń úlesinde 914 páter paıdalanýǵa berilmek.
2017 jyly oblysta salynyp jatqan 23 mekteptiń 14-i paıdalanýǵa berilip, 5450 oryndyq mektepke deıingi balalar mekemesi ashylady dep belgilengen.
