Aqtóbe janarmaı beketterindegi suıytylǵan gaz máselesi shilde aıynda sheshiledi
AQTÓBE. QazAqparat - Aqtóbedegi janarmaı beketterinde suıytylǵan gaz tapshylyǵy sezilýde. Gaz baǵasy tómen bolǵandyqtan, kóptegen avtokólik ıeleri arzan otynǵa kóshýde. Arnaıy brıfıng barysynda oblystyq energetıka jáne turǵyn úı bóliminiń jetekshisi mindetin atqarýshy Amantaı Beknııazov osylaı málim etti.
«Suıytylǵan gaz úshin óńirlerge beriletin aı saıynǵy kvota 4-4,2 myń tonnany quraıdy. Jáne bizdiń esebimiz boıynsha óńirimizde 206,9 myń avtokólik bar. Onyń ishinde 24 myń kólik gazdy qoldanady. Benzın baǵasynan 4 ese arzan bolǵandyqtan, kópshiligi gaz otynyna kóship jatyr. Sondaı-aq, oblys ákimdiginiń kólik quraldary - 850 kólik gazdy paıdalanýdy bastady», dep málimdedi A.Beknııazov.
A.Beknııazovtyń aıtýynsha, shyndyǵynda, aı saıyn Aqtóbe óńiri 5 400 tonna gaz paıdalanady. Shilde aıynan bastap, 4200 tonna kóleminde jańa gazben jabdyqtaý bastalady. Osyǵan baılanysty óńirlik atqarý toby energetıka mınıstrliginen gazǵa kvotany kóbeıtýdi suraıtyn bolady.
«CNPC-Aqtóbemunaıgaz» AQ jáne «Qazaqoıl» JShS óndirgen gaz taǵy 4 oblysqa qajettilikterin óteý úshin jiberiledi, dep atap ótti A.Beknııazov.
