Aqtóbe: Úıge túsken ury qonaq kisini 16 jerden pyshaqtap óltirgen
AQTÓBE. QazAqparat -Aqtóbe oblystyq qylmystyq ister jónindegi mamandandyrylǵan aýdanaralyq sotynda uıyqtap jatqan qonaqty pyshaqtap óltirgen Janbolat Ataýovqa qatysty qylmystyq is qaralyp jatyr, dep habarlaıdy QazAqparat tilshisi.
Aqtóbe oblysy, Shalqar aýdany, Toǵyz stantsııasynyń 51 jastaǵy turǵyny Nurǵazy Boranqul tisin emdetýge oblys ortalyǵyna kelip, kisi qolynan qaza boldy.
Іs materıalyna súıensek, oqıǵa ótken jyly jeltoqsannyń 26-synan 27-sine qaraǵan túni bolǵan. Qudasynyń úıine qonaq bolyp barǵan 51 jastaǵy Nurǵazy Boranqul sol kúni úsh deńgeıli úıdiń birinshi qabatynda teledıdar qarap, tynyǵýdy jón kóredi. Al ózgesi joǵary qabatta bolady. Birneshe otbasy bir shańyraq astynda turǵanymen, sol kúni birinshi qabatta eshkim bolmaǵan. Sottalýshy Janbolat Ataýov sol kúni tómengi qabattyń terezesinen kirip, ashanadan pyshaq alyp, uıyqtap jatqan Nurǵazy Boranquldyń keýde tusyna 16 ret pyshaq suqqan.
Úıdi tonaýǵa kelgen Janbolat Ataýovty úı ıesiniń balalary ustap alyp, polıtsııa shaqyrdy.
«Bolǵan iske ókinemin. Qatemdi túsindim. Іshimdiktiń kesiri bolyp otyr. Keshirim suraımyn»,- dedi sottalýshy Janbolat Ataýov.
Biraq jábirlenýshi tarap onyń barynsha qatań jazaǵa kesilýi tıistigin aıtýda.
«Kúıeýim eńbek demalysyna shyǵyp, tisin emdetý úshin Aqtóbe qalasyndaǵy qudasynyń úıine barǵan. Bizdiń 8 balamyz bar. Úlkeni turmysta, ózge balalar stýdent, oqýshy. Biz bir úıde 10 janbyz. Kúıeýimniń naýqas aǵasy da qolymyzda. Qazir asyraýshymyzdan aıyrylyp qaldyq. Ondaı adamǵa qandaı jaza qoldanaryn bilmeımin. Ómir boıy bas bostandyǵynan aıyrýdy suraımyz»,- dedi qaza bolǵan jubaıy Baqytgúl Áıten.
Aıta keteıik, memlekettik aıyptaýshy Janbolat Ataýovqa 22 jyl surady. Aıyptalýshy buǵan deıin de urlyq úshin eki ret isti bolǵan. Onyń biri boıynsha jazasyn ótep shyqqan, ekinshisinde is bitimgershilikpen aıaqtalǵan.
