Aqtóbe: Úsh aýysymdy mektep máselesin sheshý úshin qosymsha ǵımarattar salynady
AQTÓBE. QazAqparat – Aqtóbe qalasynda 8 úsh aýysymdy mektep bar. Qazir osy mektepterdiń keıbir synybynda 34 bala bilim alyp júr, dep habarlaıdy QazAqparat tilshisi.
Aqtóbede joǵary synyp oqýshylary emes, bastaýysh synyp oqýshylary mektepterge syımaı jatyr. Keıbir mektepterde 1-synyptar sany onnan asyp ketken. Ásirese jańa yqsham aýdandandar bul másele ótkir tur.
«Ár synypta 25 oqýshy bolýy tıis. Biraq jańa yqsham aýdan bolǵan soń bıyl jeti 1-synyp ashyldy. Jyl saıyn dál osy qalypty saqtap tur. Jas otbasylary kóp aýdan bolǵan soń dep boljap otyrmyz», - dedi mektep dırektory Latyp Álibı.
Úsh aýysymdy mektep máselesin sheshý úshin mektep janyna jańa ǵımarat salyna bastady. Máselen, Aqtóbe qalasyndaǵy №21, 27, 9 mektepterge japsarlas qurylys salynyp, másele sheshildi.
«Ótken jyly 7 úsh aýysymdy mektep boldy. Onyń tórteýinde másele sheshilip edi, ózge aýdandarda qosylyp, qazir barlyǵy 8 mektep oqýshylary úsh aýysymda bilim alyp júr. Bıyl 7 myń bala mektepke bardy. Taldaý boıynsha 1,5 myń bala basqa óńirden, aýdan, aýyldan kelgen eken», - dedi qala ákimi Mavr Abdýllın.
Aıta keteıik, keler jyly Aqtóbe qalasynda 5 mektep paıdalanýǵa beriledi, onyń ekeýin jeke kásipker salyp beredi. Raýan, Shılisaı aýyldary men «Nur Aqtóbe» yqsham aýdanyńdaǵy mektep memleket qarjysyna boı kóteredi.
