«Aqtóbe - Ulǵaısyn» tasjoly 2025 jylǵa deıin paıdalanýǵa beriledi
AQTÓBE. QazAqparat – «Aqtóbe - Ulǵaısyn» tasjolyna qarasty 7 ýchaske boıynsha tender ótti. Sol sııaqty jol salýǵa tıisti qarjy bólindi. Bul týraly «QazAvtoJol» AQ ulttyq kompanııasynyń Aqtóbe oblysy fılıalynyń dırektory Marat Mahambetov málim etti, dep habarlaıdy QazAqparat tilshisi.
«Búginde «Aqtóbe - Ulǵaısyn» tasjolyna qarasty 7 ýchaske boıynsha tender ótti. Bul «Batys Qytaı - Batys Eýropa» halyqaralyq kólik jolyna kiredi. Tasjol 3-i sanatqa jatady jáne kólik qatynasynyń deńgeıi óte joǵary. Táýligine 10 myńnan astam kólik júredi. Onyń deni júk kólikteri elimizdiń ońtústik óńirlerinen keledi. Ókinishke qaraı, atalǵan tasjolda jol-kólik apaty tirkelip turady. Sondyqtan «Aqtóbe - Ulǵaısyn» tasjolyn 1 sanattaǵy jol etý boıynsha tapsyrma berildi», - dedi Marat Mahambetov BAQ ókilderine arnalǵan týr barysynda.
Fılıal basshysynyń málimdeýinshe, atalǵan tasjol baǵytyn salýǵa tıisti qarajat bólindi.
«Qazir barlyq 7 ýchaske boıynsha jumys qyzý júrip jatyr. Bıyl sonyń ishinde 2 ýchaske boıynsha saraptama ótkizý josparlanyp otyr. Tasjoldyń respýblıkalyq mańyzy bar jáne onyń jalpy uzyndyǵy 260 shaqyrymdy quraıdy. Jol Aqtóbeden bastalyp Hromtaý, Qarabutaqtan Ulǵaısynǵa deıin jetedi. Odan ári Qyzylorda oblysyna baǵyt alady. 3-i sanattan 1-i sanatqa aýystyrylsa joldyń sapasy joǵarylap, kólikter qatynasy arta túsedi degen oıdamyz», - deıdi ol.
Sondaı-aq, spıker «Aqtóbe - Ulǵaısyn» tasjoly tolyq paıdalanýǵa 2025 jylǵa deıin beriletinin tilge tıek etti.
Eske sala ketsek, QR Premer-Mınıstri Álıhan Smaıylov bıyl mamyrda Aqtóbe oblysyna jumys sapary barysynda «Aqtóbe – Ulǵaısyn» avtojolynyń qurylysyn qarjylandyrý tetikterin anyqtap, jumysqa kirisý kerektigin tapsyrǵan edi.
