«Aqtóbe-Ulǵaısyn» avtojolyn qarjylandyrý tetikterin anyqtaý qajet - Álıhan Smaıylov

NUR-SULTAN. QazAqparat – QR Premer-Mınıstri Aqtóbe oblysyna jumys sapary barysynda jergilikti atqarýshy organ men Indýstrııa jáne ınfraqurylymdyq damý mınıstrligine jol qurylysyna qatysty tapsyrmalar júktedi, dep habarlaıdy QazAqparat Úkimettiń resmı saıtyna silteme jasap.

Premer-Mınıstr qazirgi ýaqytta halyqaralyq tranzıttik dálizdermen qosa, Qazaqstandaǵy joldardyń jelisi belsendi túrde damyp kele jatqanyn atap ótti.

Aqtóbe oblysynyń avtomobıl joldaryn salýǵa jáne rekonstrýktsııalaýǵa bıyl 50,3 mlrd teńge baǵyttaldy. Jyl qorytyndysy boıynsha normatıvtik talaptarǵa sáıkes respýblıkalyq joldardyń úlesi 87%-ǵa, al jergilikti joldar 72%-ǵa deıin jetkizilýi tıis.

«Ákimdik jumystardy jergilikti bıýdjetten birlesip qarjylandyrýdy ýaqytly qamtamasyz etýi tıis. Sonymen qatar, salalyq vedomstvo «Aqtóbe – Ulǵaısyn» avtojolynyń qurylysyn qarjylandyrý tetikterin anyqtap, jumysqa kirisýi qajet»

, - dedi Álıhan Smaıylov.

Sondaı-aq, Úkimet basshysy «Aqtóbe – Atyraý – RF shekarasy» avtojolynyń ýchaskesin rekonstrýktsııalaý barysymen tanysty. Ýchaskeniń uzyndyǵy – 96 shaqyrym, onyń 77 shaqyrymy 1-tehnıkalyq sanatqa sáıkestendiriledi. Joba boıynsha jumystar 2023 jyly tolyǵymen aıaqtalýy tıis. Osy jyldyń sońyna deıin merdigerler eki jolaqty asfalttaý jumystaryn aıaqtap, Qandyaǵash qalasyna deıin kólik qatynasyn ashýdy josparlap otyr.

Eske salsaq, QR Premer-Mınıstri Álıhan Smaıylov Aqtóbe oblysyna jumys sapary barysynda óńirdiń keshendi áleýmettik-ekonomıkalyq damýy jóninde keńes ótkizdi.

Birqatar mańyzdy ınfraqurylymdyq jáne óndiristik nysandardy aralady.