Aqtóbe – Ulǵaısyn tasjoly qashan tolyq paıdalanýǵa beriledi
ASTANA. KAZINFORM — «Aqtóbe – Ulǵaısyn» avtojolynyń jalpy uzyndyǵy 260 shaqyrymnan asatyn jeti ýchaskesinde rekonstrýktsııa jumystary júrgizilip jatyr. Jumys aıasynda jer tósemi salynyp, jol jabyny tóselýde, kópirler men sý ótkizý qubyrlary salynýda. Jobany tolyq aıaqtaý 2029 jylǵa josparlanǵan. Bul týraly Kólik mınıstrligi málim etti.
Vedomstvonyń málimetinshe, uzyndyǵy 28 shaqyrym bolatyn birinshi ýchaskede (791–819-shaqyrymdar) negizgi jer jumystary aıaqtalýǵa jaqyn. Munda shamamen 3,6 mln tekshe metr topyraq qazylyp, tóselgen. Joldyń joǵarǵy qabatyna arnalǵan şebendi-mastıkalyq asfaltbeton jabyny oń jaq bólikte shamamen 26 shaqyrymǵa, sol jaq bólikte 28 shaqyrymǵa tóseldi.
Sonymen qatar 45 sý ótkizý qubyry ornatylyp, mal aıdap ótýge arnalǵan bes ótkel salyndy. Sondaı-aq 24 shaqyrymǵa jýyq jol qorshaýy ornatyldy. Qazir ýchaskede 270-ten astam maman men 150-ge jýyq tehnıka jumys istep jatyr. Jyl sońyna deıin joldyń eki baǵytynda da kólik qozǵalysyn ashý josparlanǵan. Al ýchaskedegi rekonstrýktsııa jumystaryn 2027 jyly aıaqtaý kózdelgen.
— Qalǵan alty ýchaskede de jalpy uzyndyǵy 230 shaqyrymnan asatyn jol bólikterinde qurylys-montaj jumystary júrgizilýde. Joba boıynsha josparlanǵan shamamen 29 mln tekshe metr jer jumysynyń 7 mln tekshe metrge jýyǵy oryndaldy. Sonymen qatar jol negizin salý, ınjenerlik jelilerdi qaıta ornalastyrý, kópirler men sý ótkizý qubyrlaryn salý jumystary qatar atqarylyp jatyr, — delingen habarlamada.
Bul ýchaskelerde 1,3 myńnan astam maman men 1 myńǵa jýyq tehnıka jumyldyrylǵan. Qazirgi ýaqytta joba boıynsha qarastyrylǵan 84 sý ótkizý qubyry men mal ótkeliniń 22-si ornatyldy. Toǵyz kópirdiń beseýinde qurylys jumystary júrgizilip jatyr. Budan bólek, shamamen 100 myń tonna qıyrshyq tas materıaly daıyndalyp, 3 myń tekshe metrge jýyq temirbeton buıymdary óndirildi.
Barlyq ýchaskede oryndalyp jatqan jumystardyń sapasy men qurylys normalarynyń saqtalýyna tehnıkalyq qadaǵalaý júrgizilýde.
«Aqtóbe — Ulǵaısyn» avtojolyn rekonstrýktsııalaý Batys Eýropa — Batys Qytaı halyqaralyq kólik dálizin damytý aıasynda júzege asyrylyp jatyr. Joba joldyń ótkizý qabiletin arttyrýǵa, qozǵalys qaýipsizdigin jaqsartýǵa, óńirler arasyndaǵy kólik qatynasyn damytýǵa jáne Qazaqstannyń tranzıttik áleýetin nyǵaıtýǵa múmkindik beredi.
Aıta keteıik, buǵan deıin Astana – Petropavl tasjolynda 64 shaqyrymǵa jańa asfalt tóselgenin jazdyq.
