Aqtóbe turǵynyn azaptaǵany úshin sottalǵan polıtsııa qyzmetkerleri aqtalyp shyqty
AQTÓBE. QazAqparat – Aqtóbe oblystyq sotynda tórt polıtsııa qyzmetkerine qatysty apellıatsııalyq sot otyrysy boldy. Tórteýi de aqtalyp shyqty, dep habarlaıdy QazAqparat tilshisi.
Buǵan deıin habarlaǵanymyzdaı, polıtsııa qyzmetkerleriniń ústinen Qylmystyq kodekstiń «Azaptaý» baby boıynsha is qozǵalyp, bári de bas bostandyǵynan aıyrylǵan bolatyn.
Іs materıalyna súıensek, 2019 jyldyń 25 qańtar kúni saǵat 18:40 pen 22:40 aralyǵynda bir top polıtsııa qyzmetkeri jábirlenýshi R.Qulmuhambetovty uryp-soǵyp ózi istemegen qylmysty tańyp, moıyndatpaq bolǵan. Basyna polıetılen paketin kıgizip, psıhologııalyq qysym kórsetken, birneshe urlyqty óz moınyna alýǵa kóndirmek nıetpen tepkiniń astyna alǵan. Bul is boıynsha Aqtóbe qalasy Almaty aýdandyq №4 polıtsııa bólimi bastyǵynyń orynbasary Rýslan Esanov pen onyń qol astyndaǵy Marat Temirǵalıev, Dastan Hodjıbaev pen polıtsııa leıtenanty Asylbek Talasbaevqa aıyp taǵyldy. №2 qalalyq sottyń úkimimen olar 4-5 jylǵa bas bostandyǵynan aıyryldy.
Al búgin oblystyq sottyń úkimi shyqty. Oblystyq sottyń baspasóz qyzmetiniń habarlaýynsha, tórt polıtsııa qyzmetkeri de sot zalynda aqtaldy.
