Aqtóbe turǵynyn azaptaǵan 4 polıtsııa qyzmetkeri sottaldy
AQTÓBE. QazAqparat - №2 Aqtóbe qalalyq sotynda Zarechnyı polıtsııa bóliminiń qyzmetkerlerine sot úkimi shyqty. Olarǵa Qylmystyq kodekstiń «Azaptaý» boıynsha aıyp taǵylǵan, dep habarlaıdy QazAqparat tilshisi.
Іs materıalyna súıensek, 2019 jyldyń 25 qańtar kúni saǵat 18:40 pen 22:40 aralyǵynda bir top polıtsııa qyzmetkeri jábirlenýshi R.Qulmuhambetovty uryp-soǵyp ózi istemegen qylmysty tańyp, moıyndatpaq bolǵan. Basyna polıetılen paketin kıgizip, psıhologııalyq qysym kórsetken, birneshe urlyqty óz moınyna alýǵa kóndirmek nıetpen tepkiniń astyna alǵan. Bul is boıynsha Aqtóbe qalasy Almaty aýdandyq №4 polıtsııa bólimi bastyǵynyń orynbasary Rýslan Esanov pen onyń qolastyndaǵy Marat Temirǵalıev, Dastan Hodjıbaev pen polıtsııa leıtenanty Asylbek Talasbaevqa aıyp taǵyldy. Bári úılengen, balalary bar. Olar aıyptaý qorytyndysyn 2019 jyldyń maýsym aıynda aldy.
«Rýslan Esanov Qylmysty kodekstiń 146-baby 1-bóligi 2-tarmaǵy boıynsha aıyp dep tanylyp, 5 jylǵa bas bostandyǵynan aıyrý jazasy taǵaıyndalsyn. Quqyq qorǵaý salasynda 3 jyl jumys isteý quqyǵynan aıyrylsyn. Jazasyn qylmystyq atqarý júıesiniń qaýipsizdigi ortasha mekemesinde ótesin. Polıtsııa kapıtany, «Erligi úshin» medalinen aıyrylsyn», - dedi sýdıa Adılova. Sonymen qatar Marat Temirǵalıev polıtsııa kapıtany sheninen aıyrylyp, 5 jylǵa, Dastan Hodjıbaev 4 jylǵa, Asylbek Talasbaev 4 jylǵa bas bostandyǵynan aıyryldy. Bári de 3 jyl boıy quqyq qorǵaý salasynda jumys isteı almaıdy. Buǵan deıin eshqaıda ketpeý týraly qolhatpen bostandyqta júrgen polıtsııa qyzmetkerlerine sot zalynda kisen salyndy.
«Biz mundaı bolady dep oılamadyq. Úıden esh alańsyz shyǵyp kettik. Bala-shaǵamyzdy, ata-anamyzdy da ertip kelmedik. Qoǵamnyń nazaryn da aýdarý kerek edi. Bizdiń esh kinámiz joq», - dedi sottalýshy Rýslan Esanov.
Jábirlenýshi Qulmuhambetovtyń moraldyq shyǵyndy óndirý týraly aryzy ishinara qanaǵattandyryldy. Sottalýshylardyń bári 500 myń teńge tóleýi tıis.
