Aqtóbe turǵyny polıtsııaǵa nashaqorlardyń uıasyna aınalǵan jerdi kórsetti
AQTÓBE. QazAqparat - Aqtóbe oblystyq Polıtsııa departamentiniń bastyǵy Mahambet Abısatov esirtki uıasyna aınalǵan kópqabatty úıdi baqylaýǵa alatyn boldy, dep habarlaıdy QazAqparat tilshisi.
Aqtóbe qalasyndaǵy Ábilqaıyr han dańǵylynda ornalasqan kópqabatty úıdiń jertólesi esirtki tutynatyn adamdardyń ornyna aınalǵan. Bul týraly búgin oblystyq polıtsııa departamentiniń bastyǵy Mahambet Abısatovtyń esebinde belgili boldy.
«Aqtóbe qalalyq polıtsııa basqarmasy, Zarechnyı polıtsııa bólimi, Aqtóbe oblystyq polıtsııa departamenti esirtkige qarsy kúres basqarmasy, Jergilikti polıtsıa qyzmetine tapsyrma berildi. Qoǵamdyq orynda esirtki tutyný qylmystyq is bolyp sanalady. Sondyqtan baqylaýǵa alyp, búgin kúdiktilerdi ustaý mindetteledi. Eger bir orynda únemi jınalsa, demek esirtkini jaqyn jerden alady. Satý núktesin taýyp, isti jabýdy tapsyramyn», - dedi Aqtóbe oblystyq polıtsııa departamentiniń bastyǵy Mahambet Abısatov. Sonymen qatar, buǵan deıin esh shara qoldanbaǵan ýchaskelik polıtsııa qyzmetkerine qatysty qyzmettik tekserý bastalatyn boldy.
Aıta keteıik, Aqtóbede ótken jyly qylmystyq quqyqbuzýshylyq 10,5 paıyzǵa artty. Onyń ishinde, urlyq 22,5 paıyzǵa ósti. Ótken jyly barlyǵy 14 myńnan astam qylmys tirkelgen.
«2017 jyly qylmysty ashý kúrt ósti, 2018 jyly tómendedi. Birinshiden, polıtsııa qyzmetkerleri, bólim bastyqtarynyń jumysty uıymdastyra bilmeýi sebep bolyp otyr. Ony moıyndaý kerek. Obektıvti sebebi de bar. Qylmys jasaǵandardyń 89 paıyzy jumyssyz. Urlyq jasaıtyndardyń 88 paıyzy jumyssyz júrgender. Buryn sottalǵan, jazasyn ótep shyqqandardyń 78 paıyzy jumyssyz júrip, qaıta qylmys jasaǵan. Buryn isti bolyp, esepte turǵan 2 981 adamnyń 1 879-y jumys istemeıdi», - dedi Mahambet Abısatov.
