Aqtóbe turǵyny óskemendikterdi Instagram arqyly aldap kelgen
ÓSKEMEN. QazAqparat - Óskemen turǵyndaryn ózge oblystardan tanymal áleýmettik jeliler arqyly aldaıtyndar kóbeıip barady. Bul týraly QazAqparat tilshisi ShQO polıtsııa departamentine silteme jasap habarlaıdy.
Aqtóbe qalasynyń 27 jastaǵy turǵyny Instagram áleýmettik jelisinde teriden tigilgen keýdeshe satatyn ınternet-dúken týraly jalǵan akkaýnt ashqan. Jarnamaǵa ılandyrý úshin tipti keýdeshelerdiń sýretterin salyp, Qazaqstannyń kez kelgen núktesine jetkizip berý múmkindigi bar ekenin habarlaǵan. Ol úshin «Qiwi-ámııanǵa» tólemniń bir bóligin aldyn ala aýdarý qajet degen shart ta qoıady. Ol shartqa 2017 jyldan beri 8 adam oılanbaı kelisip, jalpy jıyny 800 myń teńge aýdarǵan.
«Kúdiktige qatysty Qylmystyq kodekstiń 190-baby, 2-bóliginiń 4-tarmaǵy boıynsha qylmystyq is qozǵaldy», - deıdi oblystyq polıtsııa departamentiniń baspasóz hatshysy Azamat Raısov.
Al Qostanaı oblysynyń shalǵaı aýylynda turatyn 29 jastaǵy azamatsha «Kolesa» saıty arqyly avtobólshekter «satqan». Bazardaǵy baǵadan áldeqaıda arzan turatyn taýardy alý úshin kórsetilgen telefon nómirine termınal arqyly qarajat aýdarý qajet bolǵan.Onyń bul tuzaǵyna óskemendik 2 adam túsken.
25 jastaǵy bir turǵyn «Audi» kóligine qozǵaltqysh alý úshin 83 myń teńge aýdarsa, 51 jastaǵy azamat 120 myń teńge salyp, túbirtektiń sýretin jibergen. Osydan keıin qostanaılyq kúdikti baılanysqa shyqpaǵan.
«Polıtsııa qyzmetkerleri kúdiktiniń kim ekenin anyqtap, qolǵa túsirdi. Qazir Qylmystyq kodekstiń 190-baby, 2-bóliginiń 4-tarmaǵy boıynsha sotqa deıingi tergeý bastaldy. Polıtsııa azamattardan vırtýaldy keńistikte saýda jasaý kezinde qyraǵy bolýdy suraıdy. Eshqashan taýar úshin aldyn ala tólem jasamańyz. Jasaǵan kúnniń ózinde jasyryn júıelerdi paıdalanbańyz», - deıdi Azamat Raısov.
