Aqtóbe turǵyny Qyzyl kitapqa engen 100 keli balyqty Atyraýdan alyp ketpekshi bolǵan
ATYRAÝ. QazAqparat - Atyraýda 100 keli qortpa etin alyp ketýge jol bermedi, dep habarlaıdy «QazAqparat» HAA tilshisi.
«Temirjol vakzalyna bettegen avtokólikten bekire tuqymdas balyq - qortpa tabyldy. Balyq Aqtóbe qalasynyń turǵynyna tıesili. Onyń aıtýynsha, ol qortpanyń ár kelisin 4 myń teńge tólep, belgisiz adamnan satyp alǵan. Bul fakti QR QK 339-baby «Bekire tuqymdas balyqtardy saqtaý, tasymaldaý jáne satyp alý» boıynsha sotqa deıingi tergeý jumystarynyń biryńǵaı reestrine tirkeldi», - dep habarlady Atyraý oblystyq ІІD balyq qoryna qylmystyq qolsuǵýshylyq áreketterge qarsy kúres bóliminiń bastyǵy Serik Janzaqov.
Eske salaıyq, Qazaqstannyń bastamasymen Kaspıı teńizinde bekire tuqymdas balyqtardy aýlaýǵa moratorıı jarııalandy. Balyqshylardyń aýlaǵan balyqtary qurtshabaq ósirý úshin arnaıy zaýyttarǵa jetkiziledi. Qortpa - bekireler tuqymdasyna jatatyn sırek kezdesetin balyq, Qyzyl kitapqa engen. Balyqshylar ony kóbeıtý úshin birneshe jyldar boıy bireýin de aýlaı almaı kelgen edi. Bıyl 160 kelilik bir qortpa aýlandy, odan osy aptada 30 keli ýyldyryq alyndy. Odan mıllıondaǵan shabaq ósirý josparlanýda.
