Aqtóbe turǵyndary jańa salynǵan kópqabatty úıdiń qurylysyna narazy
AQTÓBE. QazAqparat - Aqtóbedegi Batys-2 aýdanynyń turǵyndary arasy tyǵyz, oıyn alańy kishkentaı, avtoturaǵy qarastyrylmaǵan qurylysqa qarsy shyqty, dep habarlaıdy QazAqparat tilshisi.
Jańa aýdannyń turǵyndary qurylysqa ruqsat bergen memlekettik mekemeniń isin túsinbeı dal. Sebebi jańa qurylys iske assa besinshi qabattyń turǵyndary terezeden kelesi úıdiń ishin anyq kórip otyrady. Oıyn alańy kishkentaı, kólik qoıatyn jeri az. Ári qurylys jumystary kezinde tehnıkalyq qaýipsizdik erejeleri saqtalmaǵan.
«Terezemizdiń aldynan tórtinshi úı salynyp jatyr. «Jılışe» turǵyn úı kooperatıvi úsh úıdi ǵana kórsetip, biz kelisim berdik. Eki besqabatty úı qarma-qarsy tur eken, tipti uıat, besinshi qabatty kórshimizdi kórip otyramyz. Balalardyń oınaıtyn jeri de belgisiz. Jas otbasylar qonystansa balanyń oınaıtyn jerin de taba almaımyz. Quzyrly organdarǵa shaǵymdanyp, ákimdikten de kómek suradyq. Aryzdy turǵyn úı kooperatıvine bergen edik, jaýap joq», - dedi qala turǵyny Madına Qonaqbaeva.
Biraq memlekettik memeke ókilderi saraptama jasalǵanyn, eki úıdiń arasy 6 metrden assa, órt qaýipsizdigi erejesi saqtalatynyn aıtyp otyr.
«Kompanııa qurylys-montaj jumysynyń bastalǵanyn aıtty. Aldaǵy ýaqytta terrıtorııa qorshalyp, pasporty ilinedi. Munda úılerdiń arasyndaǵy qashyqtyq 6 metrden asady. Demek órt qaýipsizdigi erejesi saqtalǵan. Jer ýchaskesi berilgen kezde jan-jaqty kólik kirýge arnalǵan jol bolatyny qarastyrylǵan. Balalardyń oıyn alańy da bolady. Qujattary túgel, memlekettik saraptamadan ótip, jumys bastalǵan», - dedi oblystyq sáýlet-qurylys baqylaý basqarmasynyń basshysy Oksana Soprýn.
