Aqtóbe turaqtandyrý qoryna kókónis satyp alyp jatyr
AQTÓBE. QazAqparat - Aqtóbe turaqtandyrý qoryna 2,3 myń tonna kókónis satyp alady. Qazirgi ýaqytta kelisim júrip jatyr, dep habarlaıdy QazAqparat tilshisi.
Aqtóbe oblysynyń ákimi Berdibek Saparbaev azyq-túlik qaýipsizdigin qamtamasyz etý, baǵa turaqtylyǵyn baqylaý maqsatynda jıyn ótkizdi. Memleket basshysy Nursultan Nazarbaevtyń tapsyrmasyna oraı óńirde baǵany baǵylaý, azyq-túlik qunynyń ósýine jol bermeý qajet. Qazirgi kezde Aýyl sharýashylyǵy jáne Ulttyq ekonomıka mınıstrlikteri men Aqtóbe oblysynyń ákimdigi arasynda memorandým bar.
Kásipkerlik basqarmasynyń basshysy Anar Darjanovanyń aıtýynsha, turaqtandyrý qoryna 2,3 myń tonna kókónis satyp alýǵa kelisimshart jasalǵan. Bul ótken jylmen salystyrǵanda shamamen 900 tonnaǵa kóp. Kókónis satyp alý, qorǵa jınaý kezinde jergilikti sharýalardyń ónimderine basymdyq beriledi.
«Baǵany turaqtandyrýdyń jaqsy quraly - óńiraralyq kooperatsııa. Bastysy deldaldardyń jolyn kesip, óńirlermen tikeleı jumys isteý qajet», - dedi óńir basshysy Berdibek Saparbaev.
