Aqtóbe-Torǵaı jolyna aldaǵy 2 jylda qarjy qarastyrylmaǵan - Jeńis Qasymbek

ASTANA. QazAqaparat - Aqtóbe-Torǵaı jolyna aldaǵy 2 jylda qarjy qarastyrylmaǵan. Bul týraly búgin halyqpen eseptik kezdesýin ótkizgen QR Investıtsııalar jáne damý mınıstri Jeńis Qasymbek aıtty, dep habarlaıdy QazAqparat.

«Torǵaı-Arqalyq, Yrǵyz-Aqtóbege ótetin «Ortalyq-Batys» dep atalatyn joba bar. Sonyń taǵdyryn bileıin dep edim. Óıtkeni, bul jol ashylsa torǵaılyqtarǵa kóptegen jumys oryndary paıda bolar edi», - dedi eseptik kezdesýge qatysýshylardyń biri.

Óz kezeginde mınıstr birinshi baǵytta Astanadan Aqtóbe arqyly Atyraýǵa, ary qaraı Astrahan jaqqa, ekinshi baǵyty Atyraýdan Beıneý, Shetpe arqyly Atyraýǵa, Beıneý arqyly Ózbekstanǵa shyǵatyn joldyń jobasy bar ekendigin aıtty.

«Osy jyldyń jazynda Aqtóbe men Maqattyń eki ortasyndaǵy joldaǵy jumystardy bastaımyz. Bir-eki aıdyń ishinde Maqattan ary Atyraýǵa, Astrahanǵa baratyn joba qolǵa alynady. Biraq, osy jyldyń, kelesi jyldyń bıýdjetinde Aqtóbeden Torǵaıǵa, Yrǵyzǵa baratyn jolǵa qarajat bólingen joq. Sondyqtan aldaǵy eki jylda bul joldar bastalmaıdy», - dedi Jeńis Qasymbek.