Aqtóbe temirjol vokzaly: Aqyly avtoturaq pen bılet alý kezegine shaǵym kóp
Aqtóbeniń temirjol vokzaly mańyndaǵy avtoturaq 5 jylǵa senimgerlik basqarýǵa berildi. 2018 jyldyń sońynda avtoturaqty senimgerlik basqarýǵa alǵan «Aqtóbe parkıng» kompanııasy ár kólik úshin 100 teńge alady. Al GAZel-ge 150, avtobýsqa 300 teńge bekitilgen. Sonymen qatar avtoturaq qyzmeti 15 mınýtqa tegin. Biraq bul týraly esh jerde jazylmaǵan, qyzmetkerler de kelýshilerge eskertý jasamaıdy.
«Qalalyq ákimdikpen birge jasalǵan avtoturaq 365 orynǵa arnalǵan. Kireberiste 15 mınýt aqysyz dep jazylmaǵan. Tazalyq saqtalmaǵan, aýmaq las. Avtoturaqtyń 20-30 paıyzyn taksı qyzmeti ıelenip otyr. Olardyń lıtsenzııasy bar-joǵy belgisiz. Qyzmet avtomattandyrylmaǵan soń shynaıy kórsetkish bilinbeıdi», - dedi «Adaldyq alańy» jobasynyń jetekshisi Janbolat Tortaev.
Jolaýshylary Aqtóbe temirjol vokzalyna baryp, bılet satyp alý úshin 1 saǵat ýaqytyn sarp etedi. Reıd kezinde jolaýshylar muny rastady.
«Bılet satyp alý úshin vokzalda otyrǵanyma 40 mınýt boldy. Áli kezegim kelmedi. Janymyzda bir úlken kisi otyr, ol eki ret elekrondy kezek nómirin alǵan, ekeýi de ótip ketken. Eshkim aıtyp, jol siltemedi. Kem degende 1 - 1,5 saǵat otyramyz, eshqandaı jaǵdaı jasalmaǵan. Kóbi kútip, jekege ketip qalady», - dedi jolaýshy Arman Muhambetov.
Aıta keteıik, Aqtóbe vokzalynda 7 kassa jumys istese, onyń ekeýi aqyly. Temirjol vokzaly aldaǵy ýaqytta kassa sanyn taǵy arttyrmaq.
«Bizde elektrondy kezek bar. Aldaǵy ýaqytta qyzmet kórsetý kassasynyń sanyn arttyramyz. Talap boıynsha 1 adam bılet alýy úshin 30 mınýt kútýi qajet. Biraq úzilis kezinde nemese toptyq bılet rásimdeýde jolaýshylar uzaq ýaqyt kútip qalady. Negizi aqyly nemese temirjoldyń kassasyna bılet birdeı beriledi, kim birinshi rásimdese, sol alady. Biz zańsyz bılet satýǵa tosqaýyl qoıý úshin jumys istep jatyrmyz. «Jolaýshylar tasymaly» AQ, vokzal birlesip, komıssııa tekserýinen soń nátıje shyǵaramyz», - dedi Aqtóbe vokzalynyń bastyǵy Toıbazar Qýanyshev.
Onyń aıtýynsha, jolaýshylar aqyly avtoturaqqa jıi shaǵym aıtady.