«Aqtóbe – tarynyń astanasy» gastrofestıvali qonaqtardy ulttyq dástúrlerdiń baı murasymen tanystyrdy
AQTÓBE. KAZINFORM - «Astana» saıabaǵynda qazaq halqynyń tarıhynda, mádenıetinde jáne ulttyq taǵamdarynda erekshe oryn alatyn tary daqylyn ósirý dástúrin saqtaý men dáripteýge arnalǵan «Aqtóbe – tarynyń astanasy» gastrofestıvali ótti.
Іs-sharaǵa oblys ákimi Ashat Shaharov qatysyp, festıvaldiń kórme alańdaryn aralap kórdi, qatysýshylarmen jáne qonaqtarmen júzdesti. Sondaı-aq ulttyq dástúrlerdi saqtaý men óńirde gastronomııalyq týrızmdi damytýdyń mańyzdylyǵyna toqtaldy.
Aýqymdy sharaǵa qala turǵyndary men qonaqtary kóptep jınalyp, óńirdiń baı mádenı jáne gastronomııalyq murasyn tanytatyn jarqyn alańǵa aınaldy.
Festıval qonaqtarynyń tarydan daıyndalǵan elýge jýyq taǵam túri usynylǵan kórme-jármeńke erekshe qyzyǵýshylyǵyn týdyrdy. Qatysýshylar ulttyq taǵamdardyń alýan túrimen tanysyp, shokoladty jent ázirleý boıynsha sheberlik sabaǵyna qatysyp, dástúrli baýyrsaq pen samaýrynnan quıylǵan shaıdan dám tatty.
Kópshiliktiń nazary Áıteke bı aýdanynyń arnaıy alańyna tústi. Munda tary ósirý jáne óńdeý tarıhyna arnalǵan eksponattar qoıylyp, dándi daqyldy dástúrli tásilmen daıyndaý úderisi kórsetildi. Kelýshiler ataqty taryshy Shyǵanaq Bersıevtiń Qazaqstan aýyl sharýashylyǵyn damytýǵa qosqan úlesi týraly keńirek málimet alyp, osy daqylǵa qatysty ulttyq dástúrlerdiń erekshelikterimen tanysty.
Festıval aýmaǵynda halyq sheberleriniń qolóner buıymdary kórmesi de uıymdastyryldy. Qonaqtar teriden, kıizden, aǵashtan jáne júnnen jasalǵan avtorlyq jumystardy tamashalap, zergerlik óner týyndylarymen tanysty jáne qolónershiler ótkizgen sheberlik sabaqtaryna qatysty.
Gastrofestıval aıasyndaǵy mańyzdy is-sharalardyń biri aýyl sharýashylyǵy salasynyń mamandaryn, agronomdardy, qoǵam ókilderin jáne sarapshylardy biriktirgen «Aqtóbe – tarynyń astanasy» atty dóńgelek ústel boldy. Kezdesý barysynda tary ósirý dástúrin jańǵyrtý, onyń paıdaly qasıetteri, sondaı-aq óńirdiń agrarlyq jáne gastronomııalyq áleýetin damytý perspektıvalary talqylandy.
Gastrofestıval ulttyq taǵamdardy nasıhattaıtyn merekelik shara ǵana emes, mádenı murany dáripteýge, dástúrli ónimderge degen qyzyǵýshylyqty arttyrýǵa jáne tarıhı jadyny saqtaýǵa baǵyttalǵan mańyzdy alańǵa aınaldy. Іs-shara qazaq halqynyń tarıhy men mádenıetindegi tarynyń erekshe ornyn taǵy bir márte aıqyndap, Aqtóbe oblysynyń osy biregeı daqyldy damytýdaǵy mańyzdy ortalyqtardyń biri ekenin kórsetti.
