Aqtóbede sýǵa túsý maýsymy kezinde 12 adam kóz jumdy
AQTÓBE. KAZINFORM – Bıyl sýǵa túsý maýsymy kezinde 12 adam sýǵa batyp ketti. Al tótenshe jaǵdaılar qyzmeti men polıtsııa sý jaǵasynda ishimdik ishken adamdarǵa 8 mln teńge aıyppul saldy.
Aqtóbede sýǵa túsý maýsymy aıaqtaldy. Sýǵa túsý maýsymy 1 maýsym men 1 qyrkúıek aralyǵynda ótti.
- Sýǵa túsý maýsymy kezinde oblysta 60 jaǵadaı jumys istedi. Onyń 35-i kommýnaldyq, ózgesi jeke jaǵajaı boldy. Jaǵajaılarda 88 qutqarýshy jumys istep, bári arnaıy kýrstan ótti. Al jaǵajaıdy jabdyqtaýǵa 7 mln teńge jumsaldy. Oǵan qutqarý quraldary satyp alyndy. Byltyr biz qaıǵyly jaǵdaı qaı ýaqytta bolady degen suraqqa jaýap izdep, taldaý júrgizdik. Kóbine tústen keıin tirkeledi eken. Sondyqtan mektep janyndaǵy lagerlerdiń jumysy dál sol ýaqytqa aýystyryldy. Demek balalar osy ýaqytta eresekterdiń, tárbıeshilerdiń baqylaýynda boldy,- dedi Aqtóbe oblystyq TJD Azamattyq qorǵanys basqarmasynyń bastyǵy Isa Baıtursynov.
Bıyl qaýipsizdikti qamtamasyz etý úshin ózen jaǵalaýlaryna 33 beınebaqylaý kamerasy qondyrý týraly sheshim qabyldandy. Búginde 9 kamera jumys istep tur. Óńirde barlyǵy 206 orynǵa sýǵa túsýge tyıym salynǵan. Ol jerlerge 300-den astam belgi qondyryldy. QR Ákimshilik quqyqbuzýshylyq týraly kodekstiń 364 baby boıynsha bıyl 800-den astam adamǵa eskertý berilip, 124 adamǵa aıyppul salyndy. Al sý aıdyndarynda ishimdik ishkender 8 mln teńge aıyppul tóledi.
- Sýǵa túsý maýsymy kezinde 5 adam qutqaryldy. Onyń bireýi bala. Úsh adamdy qutqarýshylar, ekeýin turǵyndar sýdan alyp shyqty. Kóbi ózine senip, alysqa júzip ketken. Keıbiri tipti júzý bilmedi. Bıyl sýǵa túsý maýsymy kezinde oblysta 12 adam sýǵa ketti. Onyń 6-y bala. Byltyr 11 adam sýǵa batyp ketti. Taldaý júrgizý kezinde 12 adamnyń jeteýi sýǵa túsýge tyıym salynǵan jerge shomylǵany anyqtaldy. Eresekterdiń qaraýynsyz qalǵan balalar da kóz jumdy. Áıteke bı aýdanyndaǵy jaǵdaı óte qıyn. Munda bir sátte 4 adam kóz jumdy. Onyń úsheýi Atyraý oblysynyń týmasy,- dedi Isa Baıtursynov.
Eske salsaq, Áıteke bı aýdanynda 2011, 2013, 2017 jyldary týǵan balalar men 1985 jylǵy er adam kóz jumdy.
