Aqtóbe sýarmaly jerlerdi ıgerý úshin sheteldik bankterdiń kómegine júginedi
AQTÓBE. QazAqparat - Aqtóbedegi sýarmaly jerlerdi ıgerý úshin 296 mıllıon teńge bólindi.
Sheteldik banktermen qarjylandyrý máselesin sheshý arqyly, 27 myń gektar sýarmaly jer kólemin taǵy 10 gektarǵa arttyrý kózdelýde, dep habarlaıdy «QazAqparat» tilshisi.
Ótken jyly Aqtóbe oblysynyń aýyl sharýashylyǵy taýaryn óndirýshilerge 9,7 mıllıard teńge sýbsıdııa bólindi. Qarjy tolyq ıgerilgen. Sonymen qatar, qarjy ınstıtýttary arqyly 7,5 mıllıard teńge nesıe berildi.
«Sýarmaly jerlerdi ıgerý úshin jergilikti bıýdjetten 296 mıllıon teńge qarjy bólinip, 19,5 gektar sýarmaly, 27 myń gektar kóltaban jerge qujat rásimdelip jatyr. QR Sý komıtetimen birlese jumys istep, keıin sheteldik bankter arqyly qarjylandyrý josparda bar. Eger osy jumys aıaǵyna deıin jetse, 2018 jyly 37 900 gektar sýarmaly jer kádege asyrylady, ıaǵnı, taǵy 10 gektar qosylady»,- dedi Aqtóbe oblysy ákiminiń orynbasary Muhtar Jumaǵazıev.
Óńirde problemaly máseleler jetkilikti. Máselen, egiske jaramdy jerdiń 565 myń gektary ıaǵnı, 60 paıyzy ǵana ıgerilgen. Sol sııaqty shabyndyq jerlerdiń 34 paıyzy, jaıylymdyq jerlerdiń 35 paıyzy ǵana kádege asyp jatyr. Ózgesi bos tur.
«Ótken jyldyń josparyna sáıkes, óńirde 103 kooperatıv quryldy. Biz shaǵyn sharýalardyń basyn biriktirip, iri et, sút sharýashylyqtarynyń ónimdiligin arttyrýdy kózdeımiz. Biraq bul jumys áli iske aspaı tur. Jergilikti bıýdjetten 500 mıllıon teńgege jýyq qarjy bólinip, sút saqtaıtyn shaǵyn tseh ashyldy, sút tasıtyn mashına berildi. Ol mashına áli kúnge deıin bir lıtr sút ákelgen joq»,- dedi oblys ákiminiń orynbasary M.Jumaǵazıev.
Aıta keteıik, qazirgi ýaqytta elimiz boıynsha Aqtóbede alǵash ret sút, et tasýǵa arnalǵan jumys júıesi quryldy. Degenmen, sút kombınattary - 34, et kombınattary 37 paıyzǵa ǵana júktelgen.
Altynaı Saǵyndyqova
