Aqtóbe sportshylarynyń kórsetkishi óte nashar - Saparbaev
AQTÓBE. QazAqparat - Aqtóbe oblysynyń ákimi Berdibek Saparbaev qomaqty qarjy bólingenimen, sportshylardyń jetistikteri kóńil kónshitpeıtinin aıtty, dep habarlaıdy QazAqparat tilshisi.
Aqtóbelik sportshylar men jattyqtyrýshylar, sport salasynyń ardagerleri men mekeme basshylary búgin atqarylǵan jumysty qorytyndylady. Kezdesý kezinde óńir basshysy Berdibek Saparbaev Jekpe-jek saraıy, aýdandardaǵy balalar men jasóspirimder mektebi ashylǵanymen, jetistikter áli de mardymsyz ekenin aıtyp berdi. Ári Tennıs ortalyǵy, Muz saraıynyń da qurylysy júrip jatyr. Alda jeńil atletıka ortalyǵy, boks mektebiniń qurylysy bastalady. Halyqaralyq talapqa saı ortalyqtardyń qurylysy júrgenimen, sportshylardyń jetistigi tómen.
«Sporttaǵy jetistikterimiz óte nashar. Sońǵy úsh jyldyń ishinde Olımpıada oıyndaryna kiretin bir de bir álem, Azııa chempıondary, Olımpıada júldegerleri shyqqan joq. Bul degen jumysymyzdyń nashar júrgenin kórsetedi. Oblystyq basqarma túrli sport federatsııalarymen, aýdan, qalanyń ákimshilikterimen durys baılanys ornatpaǵan. Birigip jumys istegende ǵana nátıje bolatynyn esten shyǵarmaǵan jón», - dedi oblys ákimi Berdibek Saparbaev.
Qazir Indonezııada Azıada oıyndary ótip jatyr. Oǵan Aqtóbeden 8 sportshy qatysty. Ázirge balýan Meırambek Aınaǵulov ǵana qola júldeger atandy. Ózge sportshylardyń jetistigi tym tómen.
«Bir ǵana Meırambek Aınaǵulov senimdi aqtap otyr. Júzý sportyna qatysqan oıynshy aqtyq synǵa shyǵa almady. Bar jumysymyz, nátıjemiz osy boldy. Al Olımpıadaǵa bar bolǵany 2 jyl qaldy. Daıyndyǵymyz qaıda? Buryn bilikti mamandardy, bapkerlerdi shaqyrý týraly aıtylǵan bolatyn. Aqtóbeden shyqqan myqty jattyqtyrýshylardy shaqyrý jumysy nátıjesiz qaldy. Bizde sport mektepteri jetkilikti. Biraq bilikti jattyqtyrýshy qajet.
Óńirde 30 balalar men jasóspirimder sport mektebi bar. Onda 500 jattyqtyrýshy jumys isteıdi. Sońǵy ýaqytta basketbol, voleıbol damyp keledi. Ári qaraı jumysty jandandyrý kerek. Tek oblys ortalyǵynda emes, aýdandarda da sportty damytý tapsyryldy», - dedi óńir basshysy.
Aıta keteıik, sońǵy 2 jylda óńirde 60 sport nysany salyndy. Kezdesý kezinde oblys ákimi elimizdegi túrli federatsııalarmen baılanys ornatyp, sport salasyn damytýdy josparly júrgizýdi tapsyrdy. Ári jańa ǵımarttar, sport keshenderi tańerteńnen túngi saǵat 22:00-ge deıin jumys istep, demalys kúnderi adamdardyń dene shynyqtyrýmen shuǵyldanýyna jaǵdaı jasaýyn mindettedi.
