Aqtóbe sottary bir jylda myńnan astam qylmystyq isti qarady

AQTÓBE. KAZINFORM — Bir jylda qylmystyq jaýapqa tartylǵan 13 adam aqtaldy. Sondaı-aq qylmystyq jaýapqa tartylǵan myńnan astam adamnyń teń jartysy jazasyn bostandyqta júrip óteıdi. 

Aqtóbe oblystyq soty jyldy qorytyndylady. Bir jylda 13 000 azamattyq is boıynsha sheshim shyǵaryldy. Sonyń ishinde 7 myńǵa jýyq is medıatsııa tártibimen qaraldy. Sonymen birge 17 myńnan astam ákimshilik quqyq buzýshylyq týraly is qaraldy. Onyń basym bóligi jazaǵa tartyldy.

— Oblys sottarynda 1 642 adamǵa qatysty 1 398 qylmystyq is aıaqtaldy. Onyń ishinde 1 259 adamǵa qatysty 1 099 is boıynsha úkim shyqty. Barlyǵy 13 adam aqtaldy. Sottalǵandardyń 51 paıyzyna bas bostandyǵynan aıyrýmen baılanysty emes jaza taǵaıyndaldy, — dep habarlady Aqtóbe oblystyq sotynyń baspasóz qyzmeti.

Buǵan deıin habarlaǵanymyzdaı, Aqtóbe oblystyq qylmystyq ister jónindegi aýdanaralyq soty 12 adamnyń qazasyna qatysty isti qysqartty. Sýdıa qaýly shyǵarǵanda polıtsııa anyqtaýshysy óz isine salǵyrt qarady dep tanydy.