Aqtóbe soty kisi ólimine qatysty isti eki ret qarady

AQTÓBE. KAZINFORM - Sot tergeýi kezinde qylmystyq protsesýaldyq zańnama buzylǵan. Aqtóbe oblystyq qylmystyq ister jónindegi mamandandyrylǵan aýdanaralyq soty shylym suraǵany úshin poıyz bastyǵyn óltirgen sottalýshyny bul joly da 20 jylǵa bas bostandyǵynan aıyrdy.

Aqtóbe oblystyq qylmystyq ister jónindegi mamandandyrylǵan aýdanaralyq sotynda 28 jastaǵy aqtóbelikke úkim shyqty. Sottalýshy 20 jylǵa bas bostandyǵynan aıyryldy.

- Qylmystyq kodekstiń 99-baby 2-bóligi 9-tarmaǵy boıynsha aıypty dep tanylyp, 18 jylǵa bas bostandyǵynan aıyrý jazasy taǵaıyndalsyn. 2025 jyldyń mamyr aıyndaǵy sot úkiminiń ótelmegen bóligin qosa eseptep, túpkilikti 20 jylǵa bas bostandyǵynan aıyrý jazasy taǵaıyndalsyn. Jazasyn qaýipsizdigi joǵary túzetý mekemesinde ótesin. Jábirlenýshiniń azamattyq talap aryzy ishinara qanaǵattandyrylyp, 15 mln teńge moraldyq shyǵyny jáne zańdy ókilge 800 myń teńge ótelsin,- dedi sýdıa A. Sabyrov.

Sonymen birge sýdıa sot tergeýi kezinde qylmystyq protsesýaldyq zańnamanyń buzylǵanyn aıtty.

Sot úkimi kezinde Aqtóbe oblystyq PD bastyǵy men Aqtóbe oblysy prokýroryna jeke qaýly shyǵardy. Sebebi sottalýshy buǵan deıin urlyq jasaǵany úshin aldymen shartty jazaǵa tartylyp, keıin bas bostandyǵynan aıyrylǵan. Polıtsııa sot úkimin oryndamaǵan, al prokýror sot úkiminiń oryndalýyn qadaǵalamaǵan. Saldarynan sottalýshy taǵy qylmys jasap, kisi óltirgeni úshin sottaldy.

Eske salsaq, byltyr jeltoqsan aıynda Aqtóbe oblystyq qylmystyq ister jónindegi mamandyrylǵan aýdanaralyq sotynda poıyz bastyǵynyń ólimine qatysty istiń úkimi shyqty.

Dál osy is úsh aıǵa jýyq ýaqyt ishinde qaıta qaralyp tur. Buǵan deıin habarlaǵanymyzdaı, byltyr jaz aıynda jolaýshylar poıyzynyń Aqtóbe ýchaskesindegi bastyǵyn qalanyń eski bóliginde óltirip ketti. Polıtsııa qylmystyq is qozǵap, kúdiktini birden ustady.