«Aqtóbe – Shymkent» baǵytyndaǵy ushaqta janjal shyǵarǵan jolaýshy reısten túsirildi

AQTÓBE. KAZINFORM – Jolaýshy mas kúıinde áýe kompanııasynyń qyzmetkerlerin balaǵattap, ózin dóreki ustaǵan. Aqtóbe stantsııasyndaǵy jelilik polıtsııa qyzmetkeri ákimshilik hattama toltyrdy.

Oqıǵa 22 tamyz kúni boldy. Kóliktegi polıtsııa departamentiniń baspasóz qyzmetiniń habarlaýynsha, Túrkistan oblysynyń 48 jastaǵy turǵyny mas kúıinde janjal shyǵarǵan. Ol áýe kompanııasynyń qyzmetkerlerin balaǵattap, ekıpajdyń talaptaryn oryndamaǵan.

- «Aqtóbe-Shymkent» baǵytyndaǵy áýe kemesi komandıriniń aktisine sáıkes polıtsııa qyzmetkerleri 48 jastaǵy Túrkistan oblysynyń turǵynyn reısten túsirip aldy. Polıtsııa barǵan kezde de ol bılik ókilderiniń zańdy talaptaryna baǵynbaı, qasaqana qarsylyq tanytqan. Quqyqbuzýshyǵa qatysty Ákimshilik quqyqbuzýshylyq týraly kodekstiń úsh baby, ıaǵnı qoǵamdyq oryndarǵa alkogoldik masań kúıde kelgeni, usaq buzaqylyq jasaǵany jáne quqyq qorǵaý organy qyzmetkeriniń zańdy talabyna baǵynbaý boıynsha ákimshilik hattamalar toltyryldy. Materıal protsessýaldyq sheshim qabyldaý úshin sotqa joldandy, - dep habarlady Kóliktegi polıtsııa departamentiniń baspasóz qyzmeti.

Buǵan deıin habarlaǵanymyzdaı, «Scat» áýe kompanııasynyń Aqtaý - Shymkent reısiniń jolaýshysy ushaqta jarylǵysh zat baryn habarlap, saldarynan shamamen 200 adam shuǵyl evakýatsııalandy, al arnaıy qyzmet ókilderi ushaqty tekserdi. Júrgizilgen muqııat tekseristen keıin jarylǵysh zat tabylǵan joq. Jolaýshy ustaldy. Mańǵystaý kóliktegi polıtsııasy áıelge qatysty «terrorızm aktisi týraly kórineý jalǵan aqparat taratý» babymen qylmystyq is qozǵady.