Aqtóbe shekarasynda qyzanaq pen aısberg salatynan karantındik zııankes anyqtaldy
AQTÓBE. KAZINFORM — Reseıden jetkizilgen ónimdi mamandar «Jaısań» jáne «Álimbet» shekaralarynan keri qaıtardy. Qyzanaq pen aısberg salatynan basqa zyǵyr jáne arpadan da karantındik zııankes anyqtaldy.
QR AShM Agroónerkásiptik keshenindegi memlekettik ınspektsııa komıteti Aqtóbe oblystyq aýmaqtyq ınspektsııa mamandary Reseıden ákelingen birneshe taýardy tekserdi. Tekserý «Jaısań» jáne «Álimbet» shekara beketterinde júrgizildi.
— Aısberg salatynan batys gúliniń trıpsi anyqtady. «Jaısań» shekara beketindegi karantındik ónim salmaǵy — 700 keli. Sonymen qatar «Álimbet» shekara beketi arqyly Reseıden Túrkistan oblysyna baǵyt alǵan júk kóligindegi taýar tekserildi. Onda 27,6 tonna arpa jáne 50,5 tonna zyǵyr tuqymy boldy. Arpadan oıranshóp tuqymy, zyǵyrdan jataǵan ý kekire tuqymy anyqtaldy. QR «Ósimdikter karantıni týraly» Zańyna sáıkes karantındik obekt anyqtalǵan jaǵdaıda ónim aınalymǵa jiberilmeıdi, — dep habarlady QR AShM Agroónerkásiptik keshenindegi memlekettik ınspektsııa komıteti Aqtóbe oblystyq aýmaqtyq ınspektsııa.
Sonymen birge Aqtóbe qalalyq aýmaqtyq ınspektsııasynyń ósimdikterdi qorǵaý jáne karantın jónindegi ınspektorlary men QR AShM AÓK MIK «Fıtosanıtarııa» oblystyq fılıaly mamandary birip tekserý júrgizip, qyzanaqtan da zııankes anyqtady. Ońtústik amerıkalyq qyzanaq kúıesi jáne qyzanaqtyń końyr qatparly vırýsy tabyldy. Zertteýden soń ónim ıelerine qatysty sheshim qabyldaý úshin ákimshilik is sotqa jiberildi.
Buǵan deıin habarlaǵanymyzdaı, Petropavlda Reseıden ákelingen aǵashtan qaýipti karantındik zııankes anyqtaldy.
