Aqtóbe shegirtkemen kúresý úshin úıir-úıir jylqy, otar-otar qoı ósirýde
AQTÓBE. QazAqparat - Aqtóbede úıirli shegirtkemen kúreske - 153 mıllıon, saıaq shegirtkemen kúres jumystaryna 30 mıllıon teńge bólindi.
Úıirli shegirtkege qarsy is-sharalarǵa qarjy respýblıkalyq bıýdjetten bólinip otyr, dep habarlaıdy QazAqparat tilshisi.
Aqtóbe men Orynbor shegirtkemen kúres jumystaryn birlese júrgizedi. Búgin jerdi ýlaý jumystaryna jumyldyrylatyn tehnıkalar tanystyryldy.
«Shegirtkemen kúres jumystaryna daıyndyq joǵary deńgeıde júrýde. Qazir zııankester óte az. Bul birlesken jumystyń nátıjesi dep bilemiz. Máselen, 2012 jyly biz 1 mıllıon gektar memlekettik, aýyl sharýashylyǵy maqsatyndaǵy jerlerdi ýlasaq, qazir onyń aýmaǵy 3 esege azaıdy. Bıyl 300 myń gektar jer zalalsyzdandyrylady. Úıirli jáne saıaq shegirtkemen kúres aýdandarda da júrip jatyr»,- dedi Aqtóbe oblysy ákiminiń orynbasary Muhtar Jumaǵazıev.
Aıta keteıik, shegirtkemen kúres jumystary kezinde qus ósirip, zııankesterdi tabıǵı jol arqyly azaıtý kózdelgen bolatyn. Muhtar Jumaǵazıevtiń aıtýynsha, bul jumystar jalǵasyp jatyr.
«Ata-batamyz zııankestermen, shegirtkemen úıir-úıir jylqy, otar-otar qoıdy dalaǵa jaıyp, kúresken eken. Biz de mal basyn arttyryp jatyrmyz»,- dedi ol.
