Aqtóbe sharýalary kóktemgi egiske qajet tuqymdy ózge óńirlerden alady
AQTÓBE. QazAqparat – Aqtóbe sharýalary qajetti tuqymnyń bir bóligin Batys Qazaqstan, Qostanaı, Soltústik Qazaqstan oblystarynan alady, dep habarlaıdy QazAqparat tilshisi.
Aqtóbede oblysynyń sharýalary bıyl 722 myń gektar jerdi kádege jaratady. Onyń 375 myń gektary - dándi-burshaqty daqyl.
Al 85 myń gektary maıly daqyldarǵa arnalǵan bolsa, mal azyǵy daqylyna 250 myń gektar qarastyrylǵan.
Kartop úshin 6 myń gektardan astam jer bólindi.
«Qýańshylyqqa baılanysty egistik alqapty ártaraptandyrý jumysy jalǵasyp jatyr. Bıyl da sharýalar dándi daqyldyń kólemin azaıtyp, mal azyǵyn daıyndaýǵa betburys jasap otyr. Bir jyldyq, kópjyldyq shópti ósirý mańyzdy. Sebebi dalalyqtan shóp orý tıimsiz bolyp ketti. Sonymen birge maıly daqyl kólemin arttyrý jumysy da qolǵa alyndy. Maıly daqyldy ósirý tıimdi ári óńirde ósimdik maıyn shyǵaratyn zaýyt bar. Zaýyt tolyq qýattylyǵymen jumys istese, sharýalarǵa ónimin esh kedergisiz ótkize alady», - dedi oblystyq aýyl sharýashylyǵy basqarmasynyń basshysy Isataı Espaǵanbetov.
Sharýalar kóktemgi dalalyq jumystaryna arnalǵan tehnıkasyn da saılap jatyr. Tehnıka daıyndyǵy 96% quraıdy.
Sonymen birge óńir sharýalary úshin 9,6 myń tonna dızel otyny bólinbek. Bıyl lıtri 184 teńge bolady.
«Bıyl aýyl sharýashylyǵy qurylymdaryn qoldaý maqsatynda eginshilik sharýashylyǵyna 1,3 mlrd teńge bólindi. Onyń 480 mln teńgesi tuqym sharýashylyǵyna, 452 mln teńgesi gerbıtsıdterdiń qunyn sýbsıdııalaýǵa qarastyryldy. 323,7 mln teńge tyńaıtqyshtyń qunyn sýbsıdııalaýǵa baǵyttaldy. Tuqymmen qamtamasyz etý máselesi bar. Ózimizdiń óńirden, sonymen birge Batys Qazaqstan, Qostanaı, Soltústik Qazaqstannyń tuqym sharýashylyqtarynan alamyz. Reseı Fereratsııasynan tuqym ákelý máselesi boıynsha qujatty Aýyl sharýashylyǵy mınıstrligine berdik. Reseıdiń kompanııalarymen kelisimshartqa otyrǵan sharýalardyń tizimi mınıstrlikke jiberildi. Ortalyqtandyrylǵan deńgeıde sheshý josparlandy», - dedi oblystyq aýyl sharýashylyǵy basqarmasynyń basshysy Isataı Espaǵanbetov.
«Agrarlyq nesıe korporatsııasy» AQ AOF dırektory Gúljanat Erǵazına kóktemgi dalalyq jumystaryn júrgizý jaıyn aıtty.
«Aýyl sharýashylyǵy qurylymdaryn qoldaý maqsatynda jumys jasap jatqan «Keń dala» baǵdarlamasy aıasynda egin salý jumystaryna bıyl 1,2 mlrd teńge bólingen bolatyn. Qaryz alýshylardyń pýly 2,6 mlrd teńgeni quraǵandyqtan, qosymsha qarajat bólý máselesi qarastyrylyp jatyr. Budan bólek, kóktemgi dalalyq jumystardy júrgizý úshin «Keń dala» baǵdarlamasymen qatar, «Agrobıznes» jáne «Eńbek» baǵdarlamalary (qaıta ınvestıtsııalanatyn qarjylar) aıasynda da qarjy alýǵa bolady», - dedi Gúljanat Erǵazına.
«QazAgroQarjy» AQ AF dırektory Azamat Tursynbekulynyń sózinshe, 2021 jyly óńirdegi agroónrekásip kesheniniń 315 sýbektisi 8 mlrd teńgege qarjylandyrylǵan.
Atap aıtqanda, aýyl sharýashylyǵy taýaryn óndirýshilerge lızıngke 818 tehnıka berilip, sharýalar jeńildetilgen sharttarmen 262 traktor, 13 kombaın, 29 tuqym sepkish, 514 birlik basqa da aýyl sharýashylyǵy tehnıkasyn satyp alýǵa múmkindik aldy.
Jyl basynan beri agroónerkásip kesheniniń 25 sýbektisi 32 birlik tehnıka aldy.
