Aqtóbe sharýalary egis alqaptaryn arttyrýǵa Eýropalyq bankten nesıe aldy
AQTÓBE. QazAqparat - Bıyl Aqtóbede sýarmaly jer kólemi 8,5 myń ga artady. Sharýalar Eýropalyq qaıta qurý jáne damý bankinen nesıe aldy, dep habarlaıdy QazAqparat tilshisi.
Bir aptadan soń Aqtóbe oblysynda dán sebý jumystary bastalady. Qazirgi kezde óńirge qajetti 8 800 tonna dızel otynnyń basym bóligi jetkizildi. Mamyr aıynda qalǵan 3 800 tonna janarmaı ákelinedi. Óńirde egis qurylymy 15 paıyzǵa artyp otyr. ıAǵnı, dándi, maıly daqyldar ósirý, mal azyǵy, kókónis egý kólemi artady. Sýarmaly ádisti paıdalanatyn sharýalar da jumysyn bastady.
«Eýropalyq qaıta qurý jáne damý banki arqyly bes aýdan sharýalary nesıe alady. Nesıe barlyǵy 30-dan astam sharýashylyqqa tıdi. Olardyń arasynda «Prıgorodnyı», «Bolat LTD» seriktestikteri, «Serik», «Taý» sharýa qojalyqtary, «Tulpar» AQ, «Jantizer» ShQ bar. Hromtaý, Qarǵaly, Alǵa, Mártók aýdandary men Aqtóbe qalasy sharýalary avtomattandyrylǵan júıeni paıdalanady. Olar telefondaǵy qosymsha baǵdarlama arqyly kez kelgen núkteden egis alqabyn baqylaıdy, ylǵal mólsherin anyqtaıdy», - dedi Aqtóbe oblystyq aýyl sharýashylyǵy basqarmasynyń basshysy Qusaıyn Sársenbaı.
Aıta keteıik, bıyl Aqtóbe sharýalaryna Agrarlyq nesıe korporatsııasy arqyly «Keń dala» baǵdarlamasymen 236 mıllıon teńge bólindi. Nesıe eki paıyzben sharýalardyń qolyna tıedi. Egis jumystary aıaqtalǵan soń, ıaǵnı, 1 qarashada qarjy keri qaıtarylýy tıis.
«Agrobıznes - 2020» baǵdarlamasy boıynsha 1 mıllıard 136 mıllıon teńge bólindi. Onyń 974 mıllıon teńgesi aýdandardaǵy nesıe seriktestikteri arqyly úlestiriledi. Nesıe 14 paıyzben berilip, 7 paıyzy sýbsıdııalanady. «Nátıjeli jumyspen qamtý» baǵdarlamasymen de nesıe beriledi.
