Aqtóbe sharýalary dándi daqyldyń teń jartysyn jınap aldy
AQTÓBE. QazAqparat - Aqtóbede egin jınaý naýqany qarqyndy júrip jatyr. Qazirgi kezde dándi daqyldardyń teń jartysy jınaldy, dep habarlaıdy QazAqparat tilshisi.
Aqtóbe oblysynyń ákimi Berdibek Saparbaev Áıteke bı jáne Hromtaý aýdandaryna baryp, egin jınaý naýqanymen tanysty. Sharýalarmen kezdesý kezinde aýyl sharýashylyǵyna tsıfrlyq tehnologııany engizýge tapsyrma berdi.
«Memleket sizderge jan-jaqty qoldaý kórsetip jatyr. Tehnıka, tuqym, tyńaıtqyshtar satyp alý úshin sýbsıdııany tolyq kólemde bólip, egin egý jáne astyq jınaý naýqandary kezinde arzandatylǵan janarmaımen qamtamasyz etti. Óz kezeginde, sizder de jerdi barynsha tıimdi paıdalanyp, onyń qunarlylyǵyn saqtap, agroónerkásiptik keshen salasyndaǵy ınnovatsııalardy engizýlerińiz kerek. Tek sonda ǵana ónimniń joǵary túsimdiligi men sapalylyǵy qamtamasyz etiledi», - dedi oblys ákimi B.Saparbaev.
Aıta keteıik, bıyl óńirde egis alańy 15 paıyzǵa artyp, barlyǵy 754 myń gektardy qurady. Onyń 444 myń gektaryna dándi daqyldar egilse, teń jartysyn sharýalar jınap aldy. Qazir gektarynan 9 tsentner astyq jınalyp jatyr.
«Oblys basshysy Hromtaý aýdanyna sapary kezinde maı ekstraktsııalaý zaýytynyń qurylysymen tanysty. Joba quny - 1,2 mlrd teńge. Onyń 796 mıllıon teńgesin «Qazagro» AQ qarjylandyrdy. Jergilikti atqarýshy bılik sý qubyry men elektr jelisin jetkizýge qoldaý kórsetti. Ári gaz qubyry jáne temirjol baılanysy qamtamasyz etiledi. Munda kúnbaǵystan ózge maqsary, zyǵyr, raps jáne soıa óńdeletin bolady. Zaýyt ashylǵan kezde 100 adam jumysqa ornalasady. Óndiris orny qazanda iske qosylyp, ónimniń negizgi bóligi Qyrǵyzstan, Tájikstan,Túrikmenstan, Qytaı jáne Aýǵanstan elderine eksporttalady», - dep habarlady oblys ákiminiń baspasóz qyzmeti.
