«Aqtóbe — Shalqar» poıyzynyń baǵyty Qazalyǵa deıin uzartyldy

ASTANA. KAZINFORM — Atalǵan baǵytty Qazalyǵa deıin uzartý turǵyndarǵa sapaly, qaýipsiz jáne yńǵaıly qatynaý múmkindigin usynady, dep habarlaıdy «Jolaýshylar tasymaly» AQ baspasóz qyzmeti.

Ulttyq tasymaldaýshy jolaýshylar suranysyn eskere otyryp jáne óńirlerdiń kólik qatynasyn jaqsartý maqsatynda 2 sáýirden bastap № 630/629 jolaýshylar poıyzynyń baǵytyn «Aqtóbe — Shalqardan» Qazaly stantsııasyna deıin uzartty.

Jańartylǵan baǵyt boıynsha «Aqtóbe — Qazaly» poıyzy kún ara qatynaıdy:

— Aqtóbeden jup kúnderi saǵat 22:25–te jóneltilip, Qazalyǵa kelesi kúni 11:32–de keledi;

— Qazalydan taq kúnderi saǵat 18:20–da attanyp, Aqtóbege kelesi kúni 07:34–te jetedi.

Baǵyt boıynsha jolaýshylarǵa qolaıly bolýy úshin Jylan, Toǵyz, rzd. Shilikti, Sekseýil, Aral Teńizi, Qamystybas jáne Bekbaýyl stantsııalarynda aıaldamalar qarastyrylǵan.

Quramda 6 vagon (3 kýpe, 3 platskart) qyzmet kórsetedi. Aldaǵy ýaqytta jolaýshylar sany artqan jaǵdaıda qosymsha vagondar qosý josparlanǵan.

Atalǵan baǵytty Qazalyǵa deıin uzartý óńirler arasyndaǵy kólik qatynasyn edáýir jaqsartyp, turǵyndarǵa sapaly, qaýipsiz jáne yńǵaıly qatynaý múmkindigin usynady.

Buǵan deıin habarlanǵandaı, «Astana-Almaty» baǵytyndaǵy poıyzdar Shý stantsııasyna toqtamaıdy.