Aqtóbe prokýratýrasy suıytylǵan gazdy taratý isinen zańsyzdyqtardy anyqtady
AQTÓBE. QazAqparat - Aqtóbe prokýratýrasy suıytylǵan gazdy bólý isine oblystyq energetıka jáne turǵyn úı-kommýnaldyq sharýashylyq basqarmasynyń aralasqanyn anyqtady. Qazir tergep- tekserý jumysy jalǵasyp jatyr, dep habarlaıdy QazAqparat tilshisi.
Aqtóbede ótken jyly suıytylǵan gaz tapshylyǵy máselesi bastalyp, ol bıyl Úkimet otyrysynda talqylandy. Keıin suıytylǵan gazdy shekara asyrmaq bolǵandardyń qylmystyq toby ustalyp, kúdiktiler eki aı merzimge qamaýǵa alyndy . Al prokýratýra tabıǵı monopolııalardy retteý, memlekettik kirister, óndiristik jáne órt qaýipsizdigi, tutynýshylardyń quqyqtaryn qorǵaý basqarmalarymen birlesip, tekserý júrgizdi.
«Tekserý kezinde oblystyq energetıka jáne turǵyn úı-kommýnaldyq sharýashylyq basqarmasynyń jekelegen laýazymdy tulǵalary gazdy bólý jumystaryna zańsyz aralasyp, suıyq otyndy respýblıka jáne oblys aýmaǵynan tys jerlerge shyǵarǵany anyqtaldy. Memlekettik mekemeniń laýazymdy tulǵalary ókilettikteri bolmasa da aınalymnyń barlyq satysynda, atap aıtqanda, jetkizýshi-gaz jelisi mekemesi-bólshek saýda sýbektisine áleýmettik gazdy bólý isine aralasqan. Gaz quıý beketi joq janar-jaǵarmaı stantsııalaryna da gaz berilgen. Bul suıytylǵan otynnyń oblys, el aýmaǵynan syrtqa shyǵarylýyna sebep bolǵan»,- dep habarlady oblystyq prokýratýranyń baspasóz qyzmeti.
Aıta keteıik, qazir osy oqıǵaǵa qatysty Qylmystyq kodekstiń «Laýazymdyq ókilettilikterin asyra paıdalaný» baby boıynsha tergeý bastaldy. Sonymen qatar oblystyq prokýratýra suıytylǵan gazdy kóterme baǵamen satyp alyp, satýshy kompanııalardyń jumysynan da zańsyzdyqtardy tirkedi.
«Qazir oblys boıynsha «AS Gaz Logıstık», «Tsentrgaz», «Kepil- Sapa-A/KS-A» jáne «Gold Steps»JShS-i gaz taratýmen aınalysady. Olar gaz baǵasyn bir ýaqytta kelisimmen kóterip, gazdy esepteý quraldaryn keıde iske qospaǵanyn, gaz quıý stantsııalaryn aınalyp ótip, bólek jerlerde suıytylǵan otyn satqanyn anyqtady. Bul «Gaz jáne gazben qamtý týraly» Zańyna qaıshy. Al «Tsentrgaz» JShS jáne «Kepil-Sapa-A/KS-A»JShS-niń gazben qamtamasyz etýdi júzege asyratyn ınfraqurylymdary, ıaǵnı, gaz toltyrý stantsııalary múldem joq. Al «ASGaz Logıstık» JShS jáne «Gold Steps» JShS-niń óndiristik nysandary ónerkásiptik jáne órt qaýipsizdigi talaptaryna tolyq kólemde sáıkes kelmeıdi», - delingen baspasóz baıanynda.
Qazirgi kezde osy oqıǵa boıynsha «Munaı ónimderin, olardyń shyǵý zańdylyǵyn rastaıtyn qujatsyz tasymaldaý, satý jáne satyp alý» jáne «Zańsyz kásipkerlik» baby boıynsha is qozǵaldy.
