Aqtóbe prokýratýrasy mektep-ınternattaǵy bala urý deregin baqylaýǵa aldy
AQTÓBE. QazAqparat - Aqtóbelik qoǵam belsendisi Alıma Abdırova áleýmettik jelidegi paraqshasyna Jaısań arnaýly mektep-ınternatynyń tárbıelenýshisi soqqyǵy jyǵyldy dep aqparat taratty. Qazir bul istiń tergeý jumystaryn prokýratýra baqylaýyna aldy, dep habarlaıdy QazAqparat tilshisi.
Aqtóbe qalasynyń turǵyny, qoǵam belsendisi Alıma Abdırova áleýmettik jelidegi paraqshasyna mektep-ınternattaǵy bala urý deregin baıandady. Bul mektepte aqyl-oıynyń damýy tejelgen, múgedek balalar tárbıelenedi. Kóbi jetim qalǵan, keıbirinen ata-anasy bas tartqan.
«16 aqpan kúni Jaısań arnaýly mektep-ınternatynyń tárbıeshisi bir balany soqqyǵa jyqty. Onyń denesinde túrli jaraqat izi bar. Bul mektep-ınternattaǵy birinshi jaǵdaı emes. Bilim ordasynda eńbek ujymy jınalys jasap, balaǵa qol kótergen tárbıeshini jumys ornynda qaldyrý týraly sheshim shyǵarylǵan. Al tárbıelenýshiler bolsa óz-ózderin qorǵaı almaıdy. Olardyń kóbi jetim ósip jatyr»,- dep jazdy paraqshasyna Alıma Abdırova.
Aqtóbe oblystyq prokýratýrasy áleýmettik jelidegi jazbaǵa baılanysty óz sheshimderin aıtty. Aldaǵy ýaqytta tergeý jumystary oblystyq prokýratýranyń baqylaýynda bolady.
«Jaısań arnaýly mektep-ınternatynda tárbıelenip jatqan kámelet jasqa tolmaǵan balany urý deregine qatysty is qozǵaldy. Mártók aýdandyq ishki ister bólimi Qylmystyq kodekstiń «Kámeletke tolmaǵan adamdy tárbıeleý jónindegi mindetterdi oryndamaý» baby boıynsha tergeý jumystaryn júrgizip jatyr. Sot-medıtsınalyq saraptama taǵaıyndaldy. Tergeý jumystaryn oblystyq prokýratýra óz baqylaýyna aldy», - dep habarlaıdy Aqtóbe oblystyq prokýratýrasynyń apparat jetekshisi Jasulan Dáýlembaev.
