Aqtóbe prokýratýrasy qańyrap bos turǵan ǵımarattardy qorshaýdy mindettedi
AQTÓBE. KAZINFORM – Aqtóbe qalasynda qurylysy aıaqtalmaǵan nemese apatty ári bos turǵan ǵımarattar qaýip tóndire bastady. Prokýratýra olardy qorshap, beınebaqylaý kamerasyn qondyrýdy mindettep jatyr.
Prokýrorlar tekserý kezinde barlyǵy 26 nysandy anyqtaǵan. Olardyń árqaısysyna kirip, qarap shyqty.
– Qala prokýratýrasy «Aıqyn nátıje» jobasy aıasynda ıesiz, qaraýsyz qalǵan jáne qurylysy uzaqqa sozylǵan nysandar tekserildi. Tekserý nátıjesinde 26 nysannyń quqyq buzýshylyq oshaqtaryna aınalý qaýpi bar ekeni anyqtaldy. Osyǵan baılanysty nysandardy buzý, qorshaý, jaryqtandyrý jáne beınebaqylaýmen jabdyqtaý tapsyryldy. Sonymen qatar, memlekettik organdarǵa nysan ıelerin anyqtap, zań talaptaryna sáıkes túsindirý jáne profılaktıkalyq jumystar júrgizý mindeti júkteldi. Qala aýmaǵynda osyndaı nysandardy anyqtasańyz @zaiavlenieaktobe_bot telegram paraqshasy arqyly joldaý suralady, - dep habarlady Aqtóbe oblystyq prokýratýrasy áleýmettik jelidegi resmı paraqshasy arqyly.
Eske salsaq, Aqtóbe qalasynyń ortalyǵynda «Tulpar-Talgo» vagondaryna qyzmet kórsetý kesheniniń qurylysy aıaqtalmaı tur. Bos turǵanyna 10 jyldan asty. QTJ baspasóz qyzmeti byltyr nysandy qaıta jobalap, qurylys 2026-2027 jyldary aıaqtalatynyn habarlady.
