Aqtóbe polıtsııasy jol boıynda bılegen balalardy tasymaldaǵan júrgizýshini jazalady

AQTÓBE. KAZINFORM – Aqtóbe qalasynda eki bala kólikten túsip, júrginshiler jolaǵynda lezgınka bıledi. Polıtsııa júrgizýshini jazalady.

Aqtóbe qalasyndaǵy bı stýdııasy áleýmettik jelige shahardaǵy bas dańǵyldan túsirilgen vıdeony jarııalady. Keıin ony ózge áleýmettik jeli paraqshasy kóshirip basyp, kópshilik arasynda pikirtalas týdy. Vıdeoda kólik júrginshiler jolaǵy mańyna toqtaıdy. Sol kezde kólik ishinen eki bala shyǵyp, týra jolaq ústinde lezgınka bıleıdi. Uzaqtyǵy 31 sekýnd bolatyn vıdeony polıtsııa tekserip, sol jerde bolǵandardy bólimge shaqyrǵan.

— Júrgizýshi Ákimshilik quqyqbuzýshylyq týraly kodekstiń 593-baby, ıaǵnı, «Jol júrisi qaǵıdalarynda kózdelgen jolaýshylardy jáne júkterdi tasymaldaý, qaýipsizdik beldikterin nemese motoshlemderdi paıdalaný jónindegi talaptardy saqtamaý» boıynsha jaýapqa tartyldy, — dep habarlady oblystyq PD baspasóz qyzmeti. Bul bap boıynsha 5 aılyq eseptik kórsetkish mólsherinde aıyppul qarastyrylǵan.

Eske salsaq, buǵan deıin Aqtaýda jol boıynda lezgın bıin bılegender jaýapqa tartyldy.