Aqtóbe polıtsııasy oqýshylardy bilim men sport saıysyna jiberý erejesin túsindirdi
AQTÓBE. KAZINFORM - Aqtóbe polıtsııasy mektep dırektorlaryna bilim men sport saıysyna oqýshylardy jiberý erejesin túsindirdi. Jyl basynan beri 400-den astam jol-kólik oqıǵasy bolyp, onda 15 kámeletke tolmaǵan jasóspirim kóz jumdy.
Aqtóbe oblystyq Polıtsııa departamenti jańa oqý jyly qarsańynda óńirdegi mektep jáne kolledj dırektorlaryn jınady. Olarǵa jáne orynbasarlaryna balalar qaýipsizdigin qamtamasyz etý erejelerin túsindirdi.
- Jyl basynan beri jasóspirimder 42 qylmys jasady. Olardyń arasynda buzaqylyq, tonaý, ınternet alaıaqtyǵy tirkeldi. Jıynda osyndaı qylmysty boldyrmaý joly aıtyldy. Sonymen birge jol qaýipsizdigin qamtamasyz etýimiz kerek. Aqtóbede mundaı oqıǵa tirkelgeni ras. ІІM men Oqý-aǵartý mınıstrliginiń birikken buıryǵy negizinde balalar tasymaly kezinde arnaıy ereje saqtalýy tıis. Ereje boıynsha úsh kún buryn habar berip, ilesip júrýge ótinish berilýi kerek, - dedi Aqtóbe oblystyq PD Jergilikti polıtsııa qyzmeti basqarmasynyń bastyǵy Aıdos Quljanov.
Ereje boıynsha oqýshy bilim, sport, mádenı jarysqa barar bolsa, aldymen synyp jetekshisine, mektep dırektoryna, bilim bóliminiń basshysy habardar bolýy tıis.
- Jyl ishinde uıymdastyrylatyn, balalar qatysatyn sharalar tizimi polıtsııaǵa beriledi. Polıtsııa da aldyn ala bilip otyrady. Tasymal úshin qarjy bólinedi. Qarjy uıymdastyrylatyn shara aýqymyna qaraı ártúrli qarastyrylady, - dedi Aqtóbe oblystyq Bilim basqarmasy basshysynyń orynbasary Nurgúl Bertileýova.
Aıta keteıik, Aqtóbe oblysynda qysta olımpıadaǵa bara jatqan balalar jol apatyna ushyrap, 2 oqýshy kóz jumdy. Al, taıaýda Áıteke bı aýdanynan Mańǵystaýdaǵy fýtbol týrnırine bara jatqan balalar mingen kólik apatqa ushynap, onda 5 oqýshy mert boldy.
