Aqtóbe polıtsııasy eń qaýipti joldardy atady

AQTÓBE. KAZINFORM — Jol-kólik apatynan qaza tapqan adamdar sany 31,6% artty. Kóbi respýblıkalyq tasjolda boldy. 

Aqtóbe oblysynda byltyrǵa qaraǵanda bıyl jol-kólik apata 16,7% azaıdy. Alaıda qaza tapqandar sanynda ósim bar. Byltyr osy ýaqytta 19 adam mert bolsa, bıyl jolda 25 adam ajal qushty. Aqtóbe-Atyraý tasjolynda birden 6 adam, Aqtóbe qalasynyń shyǵaberisinde tórt adam kóz jumdy. Al Qarǵaly aýdany aýmaǵyndaǵy tasjolda 4 adam qaza tapty.

— Jol-oqıǵalary ekige jaǵdaıda jıi tirkeledi. Biri Aqtóbe qalasynda, ekinshisi respýblıkalyq tasjoldarda. Qalada kólikter jıi soqtyǵysady jáne jaıaý júrginshilerdi qaǵyp ketedi. Sonyń ishinde Eset batyr turǵyn alaby, Ábilqaıyr han, Á.Moldaǵulova, Sáńkibaı batyr dańǵyldarynda jıi kezdesedi. Kóbi saǵat 16:00–20:00, 20:00–00:00 jáne tańǵy ýaqytta tirkeledi. Bıyl kólikter soqtyǵysqanda 254 adam jaraqat aldy. Sonymen birge 118 jaıaý júrginshini kólik qaǵyp ketti. Úsh adam kóz jumdy. Biz joldardy jaryqtandyrý máselesin qozǵap júrmiz, — dedi Aqtóbe oblystyq PD bastyǵynyń orynbasary Ardana Saımaǵambetov.

Óńirde jol-kólik apatynyń tek tórtten biri ǵana respýblıkalyq tasjoldarda tirkeledi. Alaıda munda ólim-jitim kóp.

— Úshinshi sanattaǵy Aqtóbe-Qyzylorda jolynda táýligine 3 myń kólik júrýi kerek bolsa, qazir aǵyny 16 myń kólikke jetken. Sondyqtan Áıteke bı aýdany ákimdiginiń qoldaýymen aıyp turaǵy salyndy. Aıyppul turaǵynyń ornalasqan jeri — Qarabutaq aýyly. Birneshe jyl boıy túsindirý júrgizilgenimen, júrgizýshiler eskertýdi elemeıdi. Endi quqyqbuzýshylyq tirkelse, kólikti birden sonda jetkizemiz. Bul jolda 5 jasaq jumys istedi. Ár jasaqtyń arasy 100 shaqyrymdy qamtydy. Qazir jasaq sany 10-ǵa jetti jáne olardyń araqashyqtyǵy 50 shaqyrym bolyp tur, — dedi Ardana Saımaǵambetov.

Aıta keteıik, Aqtóbede beınebaqylaý kameralary arqyly 5 myńnan astam ákimshilik quqyqbuzýshylyq tirkeldi. Polıtsııa kameralardyń kómegimen 57 qylmysty ashty.