Aqtóbe polıtsııasy páter ishine balkon arqyly kirip, qashqyn qylmyskerdi ustady
AQTÓBE. QazAqparat – Aqtóbe polıtsııasy túrmeden qashyp, boı tasalaǵan qylmyskerli qalaı qolǵa túsirgenin aıtyp berdi, dep habarlaıdy QazAqparat tilshisi.
Aqtóbe oblystyq polıtsııa departamentiniń qyzmetkerleri Aqtóbe qalasynda jedel izdestirý is-sharalaryn júrgizý kezinde 34 jastaǵy Almatydaǵy tergeý ızolıatorynan qashyp ketken sottalǵan Damır Davýtovty ustady. Departament málimetine súıensek, sottalǵan D.Davýtov qoǵamdyq qorǵaýshymen júzdesý úshin kezdesý bólmesine shyǵarylǵan. Kezdesý ótkizgennen keıin ol dárethanaǵa barýǵa ruqsat surap, túnde sol kezdesý bólmesinde tyǵylyp qalǵan. Odan ári esik qulpyn buzyp, ákimshilik ǵımarattyń akt zalyna kirip, qosalqy shyǵý esigindegi temir qulypty syndyrady. Mekemeniń ákimshilik ǵımaratynyń aldyndaǵy qorshaýdan sekirip, qashyp ketken.
«Jazasyn óteýshiniń 11 shaǵyn aýdandaǵy páterlerdiń birinde jasyrynyp jatqany anyqtaldy. Polıtsııa qyzmetkerleriniń óz erkimen berilý týraly eskertýin elemedi. Keıin arnaıy qyzmetkerler jumyldyrylyp, olar ekinshi qabattyń balkony arqyly páterge kirip, qylmyskerdi ustady. Sondaı-aq, jaýap alý kezinde Davýtov qashqannan keıin taksımen Taraz qalasyna jetkenin jáne shamamen 5 kún buryn jol boıy kezikken kóliktermen Aqtóbe qalasyna jetkenin, odan ári jaldamaly páterlerde turǵanyn aıtty. Sottalǵan Davýtov QR QPK-niń 128-babynyń tártibimen Aqtóbe qalalyq ýaqytsha ustaý ızolıatoryna qamaldy», - dedi oblystyq PD baspasóz qyzmetiniń jetekshisi Erbolat Sarqulov.
Aıta keteıik, qylmysker buryn birneshe ret sottalǵan. Osy joly urlyq pen alaıaqtyǵy úshin 6 jylǵa bas bostandyǵynan aıyrylǵan.
