Aqtóbe polıtsııasy meıramhanadaǵy toıdy taratyp jiberdi
AQTÓBE. QazAqparat – Aqtóbe qalasynda úılený toıyn ótkizgender anyqtaldy. Polıtsııa toı qonaqtaryn taratyp jiberdi, dep habarlaıdy QazAqparat tilshisi.
Aqtóbe qalasy Zarechnyı-2 eldi mekenindegi meıramhanalardyń birinde úılený toıy toqtatyldy. 17 qazan kúni reıd kezinde ýchaskelik polıtsııa ınspektorlary Bas memlekettik sanıtarııalyq dáriger qaýlysynyń talaptary buzylǵanyn anyqtady. Meıramhanada 60 adamǵa arnalǵan úılený toıy ótkizilgen.
«Meıramhananyń kúzetshisi ýchaskelik polıtsııa qyzmetkerlerine baǵynbady. Ol ÁQBtK-niń «Quqyq qorǵaý organy nemese arnaýly memlekettik organ qyzmetkeriniń, áskerı qyzmetshisiniń, áskerı polıtsııa organynyń, sot prıstavynyń, sot oryndaýshysynyń zańdy ókimine nemese talabyna baǵynbaý» baby boıynsha jaýapqa tartyldy. Al meıramhana ıesine ÁQBtK-niń «Halyqtyń sanıtarlyq-epıdemıologııalyq salaýattylyǵy salasyndaǵy zańnama talaptaryn, sondaı-aq gıgıenalyq normatıvterdi buzý» baby boıynsha materıal jınalyp, is júrgizý sheshimin qabyldaý úshin Aqtóbe qalalyq taýarlar men kórsetiletin qyzmetterdiń sapasy men qaýipsizdigin baqylaý basqarmasyna joldandy», - dedi oblystyq PD baspasóz qyzmetiniń jetekshisi Erbolat Sarqulov.
Aıta keteıik, 18 qazan kúni Zarechnyı-2 eldi mekeninde taǵy 60 adamǵa arnalǵan toı ótkizilgen. Bul iske qatysty da ákimshilik hattama toltyryldy.
