Aqtóbe polıtsııasy kúsheıtilgen jumys tártibine kóshti
AQTÓBE. QazAqparat – Aqtóbede polıtsııa qyzmetkerleri kúsheıtilgen jumys tártibine kóshti. Jeke qurammen birge Ulttyq ulannyń sarbazdary bir apta boıy úzdiksiz jumys isteıdi, dep habarlaıdy QazAqparat tilshisi.
Qoǵamdyq tártipti qamtamasyz etý, quqyq buzýshylyqty boldyrmaý maqsatynda 31-jeltoqsan jáne keler jyldyń 1-5 qańtar aralyǵynda Aqtóbe oblystyq polıtsııa departamentiniń jeke quramy kúsheıtilgen qyzmet túrine aýystyrylady.
Kóshelerde polıtsııa jasaqtarynyń, sonyń ishinde jaıaý júretin jasaqtardyń sany artty.
Sondaı-aq merekelik is-sharalar ótetin, adam kóp shoǵyrlanatyn oryndardy túgel qamtý úshin jospar qurylǵan.
Іshki ister organdary qyzmetkerlerinen basqa qoǵamdyq tártipti saqtaýǵa Ulttyq ulannyń sarbazdary men qyzmetkerleri jumyldyryldy.
«Mereke kúnderi polıtsııa quqyqtyq tártipti qamtamasyz etý úshin keshendi is-sharalar ótkizedi. Saptyq qyzmettiń jeke quramyna buzýshylyqtardy anyqtaý, jolyn kesý, qoǵamdyq tártipti qorǵaýdy júzege asyrý jáne jol qozǵalysy qaýipsizdigin qamtamasyz etý tapsyryldy», - dep atap ótti oblystyq PD JPQB bastyǵy Ardana Saımaǵambetov.
