Aqtóbe Ózbekstan jáne Tatarstanmen aradaǵy baılanysty nyǵaıtpaq
AQTÓBE. QazAqparat - Aqtóbe Tatarstan jáne Ózbekstan elderimen aradaǵy baılanysty jandandyryp, ekonomıkalyq, mádenı, sporttyq qarym-qatynasty nyǵaıtady. Aqtóbeniń usynystaryn qazir eki el bıligi qarastyryp jatyr, dep habarlaıdy QazAqparat tilshisi.
Aqtóbede iri ekonomıkalyq forýmdar men kezdesýler jıi ótetin boldy. Máselen, ótken jyly 17 elshi issaparmen kelip, túrli kezdesýler ótkizdi. Aqtóbeniń ekonomıkalyq múmkindikterimen tanysyp, ınvestıtsııalyq jobalardy qarap, óńirdiń usynysyn bildi. Jıyndarda mádenı, sporttyq baǵytta da baılanys ornatý mańyzdylyǵy aıtyldy. Nátıjesinde Vengrııa men Lıtvanyń Qurmetti konsýldary taǵaıyndaldy.
«Óńirge kelgen halyqaralyq, álemdik qarjy uıymdarymen, bankterimen arada baılanys bar. Árqaısysyna joba usynyldy, jumys júrip jatyr. Búgin keldi, erteń nátıje kútýge bolmaıdy. Bul eki el arasyndaǵy baılanys bolǵan soń bári ortalyq deńgeıinde sheshilip, jumys atqarylady»,- dedi Aqtóbe oblystyq syrtqy baılanystar jáne týrızm basqarmasynyń basshysy Ermek Kenjehanuly.
Aıta keteıik, ınvestorlar men kásipkerlerdi Aqtóbedegi arzan gaz, elektr qýaty men qory mol ken oryndary qyzyqtyrady. Sonymen qatar, óńirdiń Eýropa men Qytaıǵa aparar tranzıttik jol bolýy, elimizdiń batysyndaǵy barlyq oblystyń temirjol baǵyttary Aqtóbe arqyly ótýi de mol múmkindik beredi. Aldaǵy jospar boıynsha Ózbekstan, Tatarstan elderimen aradaǵy baılanys nyǵaıady.
«Aldaǵy ýaqytta Ózbekstan, Tatarstan elderimen birqatar kelisimge qol qoıylady degen jospar bar. Іskerlik baılanys ornatý úshin biz eki elge de óz usynysymyzdy jiberdik. Memlekettik organdar, kásipkerler qarap, tanysyp jatyr. Olar da ózderiniń usynystaryn joldaıdy. Qazir Qazaqstan men Ózbekstan arasyndaǵy qarym-qatynas jaqsy. Eki eldiń prezıdentteri de jyl basynan beri birneshe kezdesý ótkizip, qarym-qatynasty nyǵaıtý joldaryn jan-jaqty talqylady. Sonymen qatar, Ózbekstan men Qazaqstan arasynda qosymsha ótkizý beketteri ashylyp jatyr. Biz Ózbekstanmen arada baılanys ornatyp, aýyl sharýashylyǵy salasy boıynsha kóptegen jospardy iske asyrsaq deımiz. Kásiporyndardyń da óz jospary bar»,- dedi Ermek Kenjehanuly.
Aıta keteıik, aqtóbelik kásipkerler men memlekettik organ ókilderi Ózbekstanǵa baryp, olardyń ekonomıkalyq, aýyl sharýashylyǵy salasymen tanysyp kelgen.
