Aqtóbe-Orsk baǵytynda jolǵa shyqqandar balshyqqa batyp qaldy
AQTÓBE. KAZINFORM – Aqtóbeden Reseı shekarasyna deıingi aralyqta birneshe kólik jolda qaldy. Bul aýmaqtaǵy qaıta jańǵyrtý jumysy qashan aıaqtalary belgisiz.
«QazAvtoJol» AQ Aqtóbe oblystyq fılıalynyń habarlaýynsha, Aqtóbe-Orsk baǵytyndaǵy respýblıkalyq mańyzǵa ıe joldyń jalpy uzyndyǵy 120 shaqyrymnan asady. Onyń 96 shaqyrymyna ortasha jóndeý jumysy júrgizilmek.
- Merdigerler aınalma jol ázirledi. Qazirgi kezde sol aınalma jolǵa ınertti materıal tóseý jumysy júrgizilip jatyr, - dep habarlady «QazAvtoJol» AQ Aqtóbe oblystyq fılıaly.
Dóń-Badamsha-Aqtóbe-Orsk baǵytyndaǵy joldyń 45-75 shaqyrym aralyǵynda 2023 jyly rekonstrýktsııa jumysy bastaldy. Qazirgi kezde bul jol qurylysynyń 70-80 paıyzy aıaqtalyp, tasjolda júrýge ruqsat berilgen. Degenmen byltyr paıdalanýǵa berilgen kezde-aq jolda olqy tustary boldy. Ony joıý merdigerdiń mindeti. Joba quny – 5,9 mlrd teńge.
- Qaıta jańǵyrtý jumystaryna bólingen qarjynyń 5 mlrd teńgesi ıgerilip tur. Tórtinshi sanatty joldy qaıta jańǵyrtýda sý ótkizgish qubyrlaryn salý qarastyrylǵan. Jalpy 7-17, 45-75 aralyǵy jónelgen bolsa, 17-45 shaqarym aralyǵy 2018 jyly jóndeldi. Bıyl kútip ustaý jumysyna tapsyrys beriledi,- dedi Aqtóbe oblystyq jolaýshylar kóligi jáne avtomobıl joldary basqarmasy basshysynyń orynbasary Eset Amanbaev.
Aıta keteıik, Aqtóbede byltyr salynǵan joldardan aqaý shyǵyp jatyr. Aqtóbe qalasynda joldaǵy oı-shuńqyrdy jamaýǵa 250 mln teńge bólindi. Bul jumys bir merdigerge júkteldi.