Aqtóbe óńirinde «Sybaǵa – 2025» ulttyq dástúrler festıvali ótip jatyr
AQTÓBE. KAZINFORM - Etnofestıvaldiń birinshi kúni – «Taǵylym»; ekinshi kúni – «Dástúrler jańǵyryǵy»; Úshinshi kúni – «Salbýryn» ataýymen belgilengen. Taǵy bir mańyzdy shara - 4–6 jeltoqsan kúnderi aýyl-aımaqtarda soǵymnyń dástúrli sybaǵasy taratylyp, úlken-kishige qurmet kórsetilýinde.
«Taǵylym» kúninde bilim berý uıymdarynda ulttyq qundylyqtardy dáripteıtin tanymdyq sabaqtar men sheberlik saǵattary ótti.
Búgin «Sybaǵa – 2025» ulttyq dástúrler festıvali saltanatty túrde Aqtóbedegi Óner ortalyǵynyń aldynda «Altybaqan» mádenı oıyn-saýyq baǵdarlamasymen bastaldy. Ulttyq oıyndar men dástúrli áýender toǵysqan, ulttyq naqyshqa toly sahnalyq kórinister festıvaldiń bastalýyna sán berip, kelgen jurtshylyqty óner merekesiniń rýhyna bóledi.
Etnofestıvaldiń ashylý saltanatynda oblys ákimi Ashat Shaharov quttyqtaý sóz sóılep, «Sybaǵa» ulttyq dástúrler festıvaliniń aımaqta ekinshi jyl qatarynan ótkizilip otyrǵanyn atap ótti.
-Memleket basshysy Qasym-Jomart Toqaev Ulttyq quryltaı otyrysynda «Ótkenimen ǵana ómir súretin jurt órkenıetti el bola almaıdy. Ult sapasyn jaqsartamyz desek, bir el bolyp jańa qundylyqtar júıesin qalyptastyrýymyz qajet» - dep atap ótken bolatyn. Salt-dástúr – adamzat úshin ilgerileýdiń sarqylmas qaınar kózi. Ǵylymı-tehnıkalyq progress qansha damyǵanymen, qolda bar jetistikterdiń irgetasyn qalaǵan qundylyqtardan bas tartýǵa bolmaıtyndyǵyn óskeleń urpaqqa jetkizý basty mindet, - dedi óńir basshysy.
Aıtyp ótý kerek, Aqtóbede ótip jatqan halyqaralyq ınvestıtsııalyq forým aıasynda 20 memleketten kelgen delegatsııa jáne 7 elshi sharaǵa qatysty. Ákim qonaqtarǵa rızashylyǵyn bildirip, ulttyq mádenıetti damytýǵa atsalysyp júrgen sheberler men ónersúıer qaýymǵa alǵysyn jetkizdi.
Ulttyq bolmysymyzdy dáriptep, ata-babadan mıras bolǵan rýhanı qazynany zamanaýı úlgide nasıhattaýǵa baǵyttalǵan etnofestıval aıasynda «Dástúrler jańǵyryǵy» atty úlken kontserttik baǵdarlama ótti.
Baǵdarlama barysynda kórermenderge halyq ánderi, jyr-dastandar, kúıler, ulttyq aspaptyq kompozıtsııalar, sondaı-aq otandyq dızaınerlerdiń etnostıldegi toptamalary usynyldy. «Tárbııa», Meıramgúl Taýbatyrova, Qyrǵyzstan Respýblıkasynan Gúlmıra Akmatova, Sábına Kúnkeı, mańǵystaýlyq Jannar Meńdiqulova, Inabat Eskendir syndy dızaınerlerdiń toptamalary ulttyq kıim mádenıetiniń ásem órnegin pash etti.
Kontserttiń sharyqtaý shegi – Qazaqstannyń halyq ártisi Tamara Asardyń oryndaýyndaǵy ásem ánder boldy. Kórermen qaýym belgili ánshiniń ónerin zor yqylaspen qabyldady.
Al «Sarqyt» meıramhanasynda uıymdastyrylǵan «Kóneden jetken dám» gastro-festıvalinde oblystyń árbir aýdany ózine tán ulttyq taǵamdaryn usynyp, olardyń shyǵý tarıhy men sımvoldyq máni týraly áńgimeledi. Qonaqtardyń erekshe nazaryn aýdarǵan taǵamdardyń biri — úlpershek, ol dástúrde ata-ananyń qyzyna degen qamqorlyǵy men meıirimin bildiredi.
Festıval qatysýshysy Nazıfa Aldrapekova bul taǵamnyń buryn jas kelinshek alǵash ret tórkinine kelgen kezde arnaıy daıyndalǵanyn aıtty.
«Uzatylatyn qyzǵa daıyndalatyn taǵamdy jasadym. Buryn turmysqa shyqqan qyz bala súıgen soń ǵana ata-anasyna qonaqqa barǵan. Sol kezde tórkini oǵan arnap erekshe taǵam — úlpershek ázirlegen», — dedi ol.
Qatysýshylar men qonaqtardyń aıtýynsha, festıval dám merekesi ǵana emes, tereńnen tamyr tartqan mádenı dástúrlerdi qaıta tanyp-bilýge múmkindik bergen shara boldy.
