Aqtóbe óńirinde ShOB salasynda 185 myńnan astam adam eńbek etedi
ASTANA. KAZINFORM — Aqtóbe oblysynda 78 myńnan astam kásipkerlik sýbektisi 185,1 myń turǵyndy jumyspen qamtyp otyr, dep habarlaıdy Ulttyq ekonomıka mınıstrliginiń baspasóz qyzmeti.
Ulttyq ekonomıka vıtse-mınıstri Erlan Saǵnaev Aqtóbe oblysyna jumys sapary aıasynda bıznes qaýymdastyǵynyń ókilderimen, salalyq qaýymdastyqtarmen, «Atameken» Ulttyq kásipkerler palatasymen jáne memlekettik organdardyń ókilderimen kezdesý ótkizdi.
Óńirdiń áleýmettik-ekonomıkalyq damýy týraly Aqtóbe oblysynyń kásipkerlik jáne ındýstrııalyq-ınnovatsııalyq damý basqarmasynyń basshysy Dosjan Álibekov baıandady.
Onyń aıtýynsha, Aqtóbe oblysy turaqty damý qarqynyn saqtap, joǵary ınvestıtsııalyq áleýetke ıe óńirlerdiń biri sanalady. 2026 jyldyń qańtar–sáýir aılarynda óńir ekonomıkasyna 235,4 mlrd teńge ınvestıtsııa tartylyp, naqty kólem ındeksi 106,5%-dy qurady. Jyl sońyna deıin jalpy quny shamamen 242,77 mlrd teńgeni quraıtyn 7 ınvestıtsııalyq jobany iske qosý josparlanǵan.
— Aǵymdaǵy jyldyń qańtar–aqpan aılarynda ónerkásip óndirisiniń kólemi 470,4 mlrd teńgeni qurady. Óńirde shaǵyn jáne orta bıznesti damytýǵa erekshe kóńil bólinip otyr. Búginde oblysta 78,3 myń kásipkerlik sýbektisi jumys istep, 185,1 myń adamdy jumyspen qamtyp otyr. ShOB-tyń jalpy óńirlik ónimdegi úlesi 28,8%-ǵa jetti, — delingen habarlamada.
2025 jyly ekinshi deńgeıli bankter arqyly bıznesti qoldaýǵa 13,1 mlrd teńge baǵyttalyp, 800-den astam jobaǵa qoldaý kórsetildi. Kezdesý barysynda qatysýshylar salyqtyq ákimshilendirý, kadrlardy memlekettik tapsyrys aıasynda daıarlaý, bıznesti memlekettik qoldaý tetikterin jetildirý, sondaı-aq áleýmettik jáne áıelder kásipkerligin damytý máselelerin talqylady.
Sonymen qatar kásipkerlerdiń qarjylyq quraldarǵa qoljetimdiligin keńeıtý jáne memleket, bıznes pen úkimettik emes sektor arasyndaǵy ózara is-qımyldy nyǵaıtý máselelerine erekshe nazar aýdaryldy.
Sapar barysynda ınvestıtsııalardy tartý, ónerkásiptik kooperatsııany damytý jáne óńirdiń ınvestıtsııalyq tartymdylyǵyn arttyrý máseleleri qaraldy.
Budan buryn Aqtóbede mýzykalyq-drama teatrynyń qurylysyna 8 mlrd teńge baǵyttalǵanyn jazǵanbyz.
