Aqtóbe óńiri respýblıkalyq aǵash otyrǵyzý aktsııasyna qoldaý bildirdi
AQTÓBE. KAZINFORM – Búgin oblys boıynsha 21 myńnan asa adam «Taza Qazaqstan» jalpyulttyq baǵdarlamasy aıasyndaǵy respýblıkalyq aǵash otyrǵyzý aktsııasyna belsendi qatysty.
Aqtóbe qalasyndaǵy «Trıatlon» saıabaǵynda uıymdastyrylǵan aýqymdy is-shara 800-den astam adamnyń basyn biriktirdi. Olardyń ishinde eńbek ardagerlerleri, oblystyq jáne qalalyq máslıhat depýtattary, oblystyq jáne qalalyq qoǵamdyq keńes músheleri, memlekettik organdardyń qyzmetshileri, jastar jáne «Jasyl el» eńbek jasaǵy, tipti ózderi belsendilik tanytyp kelgen qala turǵyndary da boldy.
Tabıǵı resýrstar jáne tabıǵatty paıdalanýdy retteý basqarmasynyń deregine súıensek, óńirde 10 myńdaı kóshet otyrǵyzylsa, sonyń 500-ge jýyq «Trıatlon» aýmaǵyna egildi. Onyń ishinde jemis aǵashtary aqqaıyń, shyrsha, sheten jáne taǵy da basqa aǵash túrleri bar.
Aktsııaǵa oblys ákimi Ashat Shaharov ta qatysyp, shyrsha aǵashyn otyrǵyzdy. Aımaq basshysy mundaı bastamalar óńirdiń ekologııalyq ahýalyn jaqsartýmen qatar, qoǵamda tazalyq pen jaýapkershilik mádenıetin qalyptastyrýǵa yqpal etetinin alǵa tartty.
Budan bólek, «Taza Qazaqstan» baǵdarlamasy aıasynda Aqtóbe óńirinde ekiaılyq senbilik ótkizilip jatyr. Búgin aqtóbelikter 1100 gektar aýmaqta tazalyq jumystaryn júrgizdi.
