Aqtóbe óńiriniń keskin-kelbetin aıqyndaıtyn brend ázirlenýde
AQTÓBE. QazAqparat - Aqtóbe oblysyn aıshyqtap, sheteldikterge tanystyratyn brend ázirlenedi, dep habarlaıdy QazAqparat tilshisi.
Bul baǵyttaǵy jumystar osy ýaqytta bastalyp ta ketti. Óńirdi tanystyratyn tańbalyq belgi ózge oblystarǵa, halyqaralyq tájirıbege súıenip jasalady. Bul jumyspen arnaıy pıar kompanııa aınalysady.
«Brend jasaýshy kompanııaǵa birneshe talap qoıylady. Olar óńirdiń anyqtamalyǵyn jınap, erekshelikter men artyqshylyqtaryn tizbekteıdi. Keıin halyq arasynda saýalnama júrgizedi. Mysaly, «Aqtóbe degende kóz aldyńyzǵa ne keledi?» degen jáne basqa da suraqtar boıynsha turǵyndardyń pikirin suraıdy. Turǵyndardyń pikiriniń negizinde birneshe tańbalyq belgi ázirlenip, ol arnaıy komıssııaǵa usynylady. Oblys ákimi janyndaǵy komıssııa quramynda dızaıner, sáýletshi, óńirge belgili adamdar men tarıhshylar, kásipkerler, bir sózben aıtqanda óz isiniń sheberleri bolady. Olar talqylap, túzetip, bir brendti tańdaıdy»,- dedi Aqtóbe oblystyq syrtqy baılanystar jáne týrızm basqarmasynyń basshysy Ermek Kenjehanuly.
